Cu mas di 15 aña di experiencia den e sistema di belasting di Aruba, Frank Snijders a forma parti di mayoria reforma fiscal riba nos isla pa e ultimo añanan. Separa di ta un tax-partner na BDO-WTS Aruba, desde e siman aki a eligi’e tambe como e Presidente nobo di ATIA. E tin bastante aña caba den directiva di e organisacion y como tal conoce e retonan den nos comercio.
Manera ta custumber, ta eligi un directiva nobo y ta den seno di e directiva ey nan ta eligi e puestonan. Aña pasa a eligi abogado mr. Jeannot de Cuba den e funcion di liderazgo mientras cu na final el a pone su funcion disponibel y a anuncia cu pa motibo di hopi trabou, cu e no ta pone su mes reeligibel mas den e directiva. Como tal durante e prome reunion di e directiva nobo, a eligi Frank Snijders den e funcion aki.
Frank Snijders a studia na Universidad di Tilburg na Hulanda y ta ocupa tambe e funcion di Tax-Partner na BDO-WTS Aruba y ta responsabel pa e departamentonan di Recurso Humano, Maneho di Riesgo y ta midi calidad di e trabounan di BDO-WTS Aruba.
