Recientemente a tuma luga instalacion di e directiva nobo di Quota International of Aruba pa e periodo di 2020-2021. Farida Feliciana-Figaroa den su discurso como Presidente a gradici e directiva saliente pa tur nan trabou duro y tambe tur Quotarians cu aña den y aña afo ta dedica na sirbi nos comunidad cu amor y pasion. Tambe a enfoca ariba e balornan di Quota y e importancia di servicio na comunidad, mas aun durante e periodo di reto cu nos ta pasando aden.
Maestra di ceremonia tawata Quotarian Alexia Semeleer , Charter President Gladys Henriquez a cende e bela di instalacion, Quotarian Rubinah Bernadina a presenta e invoccacion y Quotarian y alabes Vice President di Quota International, Luzmarina Gonzalez a conduci e ceremonia di instalacion
Presidente saliente Ivy Simon-Hernandez a gradici e directiva di periodo 2019-2020 pa nan bon trabou y tambe a duna un relato di tur e logronan y servicio duna na e comunidad di Aruba. Tambe a gradici tur e Quotarian cu a yuda durante aña pa haci e aña exitoso y un palabra di Danki na comunidad di Aruba cu semper ta coopera cu Quota.
E directiva nobo pa Quota International of Aruba pa e aña 2020-2021 ta lo siguiente:
- Farida Feliciana-Figaroa; Presidente
- Mirjam Auwerda-Jansen; Vice-Presidente
- Patricia van Brussel-Goede; Secretaria
- Natascha Davelaar-Janse; Tesorero
- Irma Gordon; Director di Asuntonan Huridico y Reglanan
- Ivy Simon-Hernandez; Director di Desaroyo y Crecemento
- Mariela Nava-Figaroa; Director di Servicio
E tema pa e aña aki ta ‘We Care’ y como organisacion mester bin cu ideanan innovativo y tambe demostra flexibilidad pa logra e metanan apesar di e situacion diferente cu nos ta encontra nos mes aden. Esaki ta e di 33 Directiva pa Quota International of Aruba, cu a celebra nan di 33 aniversario na Mei 2020.
Quota International of Aruba ta un organisacion boluntario di ehecutivonan femenino y cu ta dedica na mehora calidad di bida di esunnan menos fortuna den nos comunidad, specialmente esunnan cu problema di oido y pa por papia y tambe ta sostene hopi programa pa hende muhenan den dificultad y muchanan desafortuna.
