Stadhuis ta situa na Whilhelminastraat 8 y ta conoci como cas di dokter Jacobo Eloy Maria Arends. E ta e prome monumento cu Monumentenbureau hunto cu Gobierno di Aruba a restaura na 1997. Medardo ‘Dada’ Picus a diseñ’e, den estilo di arkitectura Arubano-Caribense. E tereno aki ta 1.545 m² y ta un mansion tipico Arubano.
Literalmente por yama e cas “un cas habri”, pasobra e tabatin murayanan falso cu tabata permiti cu facilmente por a conecta e espacionan cu otro. E entrada di cas tin porta grandi cu kolomnan cu ta wanta e piso di balcon di e parti ariba. Y entre e balconnan nos por mira detaye di decoracion traha di palo. E detaye aki ta e cortina di palo memey di e kolomnan yama “gingerbread”. E triangolo riba e kolomnan yama un “tempaan”. Na e parti ariba di e porta- y bentannan nos por observa e glasnan di color.
Tambe por mira cu e cas no a wordo construi na nivel di e tereno, pero tin un elevacion di mas o menos 1.50 meter. E cas di shon (herenhuis) aki a wordo eleva pasobra bou di e vloernan di palo tabatin espacio pa warda varios cos. Tambe ta eleva vloernan di palo for di tera pa nan por wordo ventila. Tambe tin bentana pa claridad por drenta.
E parti pafo na e dak por mira e ‘dakkapelnan’ y coronannan. Ariba e rand di muraya y fachada por aprecia e diferente decoracionnan. Un edificio cu detayenan masha bunita cu ta resalta den su beyeza y transforma den un historia di amor.
Tradicion Arubano di bon famia ta dicta cu prome cu un homber casa, e mester presenta su futuro esposa cu un cas nobo traha y completamente muebla. Y asina a sosode tambe. Durante compromiso entre Eloy Arends y Monica Laclé (yiu di Adriaan Lacle di cual un caminda a wordo nombra na su nomber cu ta “Adriaan Laclé Boulevard”) na aña 1922 a cuminsa cu e construccion, cu a termina na 1925, ora cu nan a casa.
Actualmente ta uza e edificio como departamento di gobierno di Aruba, Registro Civil y Censo pa tene ceremonia di matrimonio civil den e salanan representativo.
Monumentenbureau ta sigui contribui, educa y conta historia di nos Monumentonan cu tin balornan importante pa nos pais Aruba.
