Aunke tabatin mas participante, parada di mucha na San Nicolas e aña aki a bay casi sin ningun novedad. Polis a detene solamente 1 persona. Esey riba su mes ta un adelanto grandi, pasobra aña pasa tabatin 20 detencion mientras cu den e mesun parada na aña 2017 tabatin 8 detencion.
Awe merdia pa 1:02pm SMAC a start e parada di mucha na San Nicolas cu 6 grupo y mas o menos 1200 participante. Esaki ta mas cu e 5 gruponan den e mesun parada aña pasa. Pa 4:44pm e cabes di e parada a yega y pa 5:51 e parada a finalisa. Pa 7:44pm a kima e “Momito” den Carnaval Village.
Cuerpo Policial a subi caya cu 200 Polis awe. Diferente departamento a traha hunto, manera Polis Uniforma, Mobiele Eenheid, Motor Unit, Polisnan cu cacho K-9, Departamento di Recherche, empleadonan administrativo y sin lubida e adkisicion nobo di Polis, esta e Commando Kamer. Tur esaki mientras cu tur transporte di detenido tabata den man di Cuerpo Especial Arubano (CEA).
