A detene un mucha mas y prolonga tur pa maltrato di un adicto

Polis, den e caso di maltrato di un adicto na San Nicolas, a detene un di 4 mucha envolvi den e caso di maltrato pisa di un adicto ambulante na San Nicolas. Awe a presenta e cuarteto dilanti Fiscal, cu a atende cu nan riba e investigacion y su tras a hiba nan na Corte pa ey presenta nan dilanti Hues Comisario cu a aproba nan prolongacion. Ta acusa nan tur cuater pa maltrato y “openlijk geweldpleging”.

Ta trata aki di un acusacion masha serio y cu castigo pisa mara na dje. Aunke cu den caso di menornan di edad, e castigo y e procedimiento penal ta diferente y mas suave. Hues mayoria biaha ta tene cuenta cu nan edad y e oportunidad cu nan merece pa cambia nan  bida y sigui den sociedad.

Ministerio Publico a confirma prolongacion di e grupo aki y a subraya cu tur na menor di edad. E mucha hombernan aki, dos tin 12 aña, un tin 13 y e otro tin 14 aña di edad.

E video di e muchanan aki a hala hopi atencion e siman aki riba rednan social, esta di e maltrato di un adicto cu un pida palo of hero. No solamente pa e forma con a haci’e, pero pa nan curashi di grab’e riba video y publik’e tur caminda tambe, haciendo comosifuera cu ta gran cos nan a haci.