Autoridadnan ta trata di aresta e fugitivo Erick Schneiders cerando e circulo d personanan cu lo por ta yudand’e. Asina diahuebs anochi un detencion a cay hustamente pa e motibo aki.
Diahuebs den oranan di anochi team di recherche di Santa Cruz en conexion cu huida di e fugitivo:
Erick Arturo Minguel Junior SCHNEIDERS, conoci como “Miguel”, naci na Aruba dia 29 december 1994, a detene e dama di inicialnan E.J.R.K 23 aña. Esaki a base di articulo 2:146 di Aruba su codigo penal. Articulo 2:146 ta papia di esun cu libera of yuda na liberacion di un persona cu tin un castigo di prizon ta castigabel cu maximo 4 aña di prizon.
E team di recherche tin bon indicacionnan cu e fugitivo ta na Aruba ainda. Pa e motibo aki ta urgi pueblo di Aruba cu si bo por sa algo di su paradero of e sitio cu e ta scondiendo yama Polis su tiplijn 11141. Bo anonimidad ta wordo garantisa.
Pueblo ta hopi preocupa pasobra nan no ta hayando informacion y no ta mira un mobilisacion di miembronan di Cuerpo Policial en busca di e fugitivo. Ni OM no a saca nada di recompensa tampoco pa informacion cu por conduci na detencion di Schneiders, mirando cu Polis a bisa cu ta trata di un persona sumamente peligroso.
Peligroso pa motibo ademas di caso di atraco cu e tabata envolvi den dje, na februari aña pasa el a haya un castigo di 12 aña pa asesinato di un homber dilanti e club nocturno Olde Molen. E caso aki a tuma luga un aña prome, esta dia 21 di mei, 2017. El a tira riba e homber aki kende a fayece na e sitio mes. Despues di e sucedido el a huy, pa finalmente entrega su mes 9 dia despues.
Miguel Schneiders a huy di Warda di Polis na Santa Cruz di un forma straño dia 14 di juli ultimo, pues ta bay cumpli un luna otro siman.
E fugitivo Schneiders ta wordo considera un criminal hopi peligroso, ya cu cera den KIA mes el a comete un otro delito, agredi un otro preso pa cual e tabata cera na Sta Cruz pa investigacion.
Pues ni e hecho cu e tabata cera den KIA a stop su agresividad. E preso en cuestion a keda seriamente herida. Investigacion haci a mustra cu Eric Schneiders tabata esun envolvi, pa cual a ordena su detencion y a cer’e na Warda di Sta Cruz, mientras cu ta investigando e caso y pa interogacion. Na momento cu el a huy, tabata falta algun dia so pa hib’e pa KIA. Tur cos ta indica cu el a planea pa huy prome cu nan hib’e pariba bek.
Con el a logra huy. Despues cu Schneiders a burla di henter e sistema di siguridad na Warda di Sta Cruz, a cuminsa un investigacion. Mas ainda con e por a logra haci esaki asina facil. A bin constata cu el a “zaag” un par di trali, cu sigur no ta trabou di un dia y sigur no durante e par di rato cu ta haya chens di lucht. Ta algo cu mester a bin ta tumando luga pa algun dia caba.
Recientemente a detene e mama di Schneiders y un otro persona mas interogacion y despues di un dia a laga nan bek liber. Awo ta un ruman a keda deteni.
Mientrastanto a detene e e otro preso cu a huy recientemente, Gerson Martin, na un adres na Bubali.
