Un rato pasa Cuerpo Policial a confirma cu nan a detene un pasahero na aeropuerto di Aruba, relaciona cu un menasa di bom. E prome informe ta bisa cu un pasahero lo a grita “bom” den e seccion di “US Customs and Border Protection”. Te ainda ta desconoci si ta hende homber of hende muhe, tampoco nos no ta na altura di ki nacionalidad e tin y ni su destinacion.
E personal di siguridad di Merca a detene e pasahero mesora y a pas’e pa Polis local, cu a hib’e pa proces’e. Den e interogacion lo mester sali afo kico ta e motibo di su menasa of si ta un “chansa” e kier a haci na e luga incorecto!
Un menasa di bom na un aeropuerto ta un delito serio cu por hinca e pasahero den hopi problema. No solamente penalmente cu husticia, pero tambe cu e aerolinea. Nan por nenga di transporta e pasahero aki riba e vuelo en cuestion y hasta den futuro. Den cierto caso aerolineanan por cera cabes y nenga tipo di pasaheronan asina pa cumpra pasashi cerca nan. E otro asunto ta cu por cobra e pasahero e daño financiero cu nan a causa e aerolinea dor di mester cancela vuelo of pa e “delay” cu tipo di menasanan asina ta causa.
Pa Aruba Airport Authority, e menasa di awe a causa bastante dolor di cabes pasobra ta e dia mas ocupa di nos aeropuerto. Mester a evacua tur pasahero, saca tur pafo y hasta empleadonan mester a bandona e edificio. Consecuentemente tur vuelo, cu normalmente ta sali atardi, a conoce un vertraging. For di pafo por a mira filanan largo di pasaheronan wardando den solo pa por drenta na Migracion, cu a cera porta completo pa Polisnan por a investiga e menasa.
