Diahuebs anochi laat net prome cu mey anochi a detene un homber na su cas situa na Meiveld. Ta acus’e di violencia domestico. Unidadnan di Polis a bay pura na Meiveld # 1-F pa un homber cu tabata maltratando un dama den cas.
Ora Polis a yega na e sitio a topa cu e homber y e dama. Polis a mira cu e dama tabata maltrata y kier a entrega keho.
Polisnan a detene e sospechoso na e sitio mes, a boei e homber y mustr’e riba su derechonan durante e proceso di detencion. Kico a conduci na e problema no ta conoci. E homber a bay topa cu Sub Fiscal cu mester dicidi si e lo bay cel mesora despues di scucha su splicacion relaciona cu e agresion na cas contra su pareha of casa.
