Despues cu Ministerio Publico a pidi cooperacion di parti di comunidad na Corsou pa haya esnan responsabel di e candela di dia 22 di augustus ultimo, a drenta informe cu a detene dos persona, aparentemente di nacionalidad Venezolano, relaciona cu e caso di candela na Servicio di Impuesto. Pero despues di algun rato y presenta dilanti di Fiscal Auxiliar, e ultimo persona cu a detene, a recobra su libertad.
Mirando cu tabata tin un video cu a circula di un vehiculo cu a yega dilanti di e edificio y a mira un persona baha na careda pa bolbe un rato despues, a drenta varios tip caminda cu finalmente a pone man riba e sospechosonan.
A haya e vehiculo en cuestion den e bario di Rancho. Cu e detencion aki, e caso ta casi soluciona, segun vocero policial di KPC.
For di Cuerpo Policial di Corsou, a ricibi e siguiente comunicado di prensa, referente e suceso aki:
Relaciona cu e caso di candela cu a tuma luga na oficina di Impuesto situa den Regentesselaan na Corsou, den e marduga di diahuebs 22 di augustus ultimo, Cuerpo Policial di Corsou a haci un detencion. Diasabra 31 di augustus 2019, banda di di 12’or y 40, e Team di aresto a detene un sospechoso den e caso aki. Ta trata di e homber sospechoso R.R.M., naci na Venezuela di 31 aña di edad.
Detencion di e sospechoso a tuma luga na un bar den area di Rio Canario. Na momento di su detencion e sospechoso tabata den compania di un homber mas cu tambe a keda deteni. Despues cu a presenta e homber ultimo aki dilanti di un Fiscal Auxiliar el a keda den libertad. En conexion cu e detencion di R.R.M., personal di Team di Aresto hunto cu e team di investigacion den compania di Fiscal di Ministerio Publico a tene entrada hudicial na cas di e sospechoso den San Souci, caminda a confisca articulonan cu ta di importancia p’e investigacion. E sospechoso R.R.M. a keda presenta dilanti un Fiscal Auxiliar cu a ordo su encarcelamento pendiente di mas investigacion. E investigacion den e caso aki ta continua.
