A detene chauffeur patapata burachi

Awe marduga Polis a detene un chauffeur demasiado cansa y bebi. E tabata stuur un V-Wagen y banda di ex La Fama na Playa a subi acera djey medio mishi palo di lus. Otro chauffeur a pit’e pa e lanta for di soño. El a sigui core tur malo den diferente caya y pasa crusadanan sin para. Finalmente a yega te na CITGO Boulevard unda eynan Polis a topa cune.

A pidi’e pa baha for di auto y a lag’e supla pa midi e nivel di alcohol den su rosea. E maximo cu ta permisibel pa supla y ainda considera como “sober” ta 220 ugl, pero e “compai” aki a supla no menos cu 920 ugl, pues casi cinco biaha mas!

Polis a deten’e y hib’e Warda di Polis pa por interog’e y eynan dicidi sea riba su encarcelacion of kita su rijbewijs for di dje. Den practica, ora bo surpasa 570 ugl, mayoria bes ta kita bo rijbewijs y te ora Bo presenta dilanti Hues ta dicidi si Bo ta hay’e bek, sea cu un multa of otro condicionnan mara na dje. Tin caso unda hasta ta obliga e chauffeur pa drenta un programa di adictonan na alcohol “AA” pa sigura cu e tipo di actonan asina no ta ripiti.

Den e caso specifico aki, e chauffeur tabata asina bebi y asina cansa cu e tabata pega soño cada rato tras di stuur, un acto sumamente peligroso. Bon mes cu algo mas serio no a sosode cune.