A detene chauffeur burachi despues di a causa accidente

790

Diadomingo anochi pa 10:45pm a sosode un accidente na e birada skerpi di Sero Blanco direccion Paradera. Tabata obvio cu atrobe tabatin un chauffeur burachi envolvi, pa cua Polis mester a detene y hibe Warda di Polis pa presenta dilanti un Fiscal Auxiliar.

Chauffeur di un auto marca Nissan modelo Pick-up color berde, cu number A-18297, probablemente burachi, a bay core otro banda di caminda y bay dal den trafico biniendo di direccion contrario.

E Pick-up a dal den un auto marca Toyota modelo Tercel color blanco cu number A-29504, cu tabata bayendo direccion rotonde Sero Blanco.

Mester menciona cu despues di e accidente, chauffeur di e Pick-up color berde a purba huy for di e sitio. Testigonan sinembargo a nota su intencion y a detene mesora, sperando yegada di Polis.

Polis a pone e chauffeur supla pa test e nivel di alcohol den su rosea, pero di baina e por a supla drechi pa test su alcohol. No a keda nada otro pa detene y transporte pa warda di Polis.

Mester remarca cu alcohol a domina noticianan e fin di siman aki. Corda cu cada accidente pa via di chauffeur burachi, ta un accidente di mas y cu por a preveni. Corda bon: Trafico SIGUR ta responsabilidad di nos TUR!