A detene chauffeur betra cu a ocasiona accidente den Playa

1878

Awe diadomingo pa mas o menos 10:10PM  a sosode un accidente na e crusada di Avenida Alo Tromp cu Emmastraat na Playa. Un auto marca Chevrolet color blanco modelo Aveo numera A-11736 biniendo riba Avenida Alo Tromp, no a duna preferencia na e auto marca Honda color shinishi modelo Accord biniendo riba Emmastraat. E autonan a dal den otro, lagando daño material limita atras.

Aunke cu e daño material no tabata mucho toch e auto modelo Aveo no por a move riba su propio forsa, pa cual mester a yama un takelwagen a busc’e. Transporte Policial a busca e chauffeur di Aveo cu a bebe poco di mas y casi no por a duna ni su nomber na Polis. Ora cu a hinc’e den transporte di Polis, el a cay na rudia y un agente mester a lastr’e push’e paden.