Tur cos a cuminsa dia 9 di februari ultimo, ora a baha un pasahero Venezolano for di un vuelo di KLM pa Hulanda. A detene mesora, despues di a ristra su maleta y a topa cu 46 bara di oro na balor di 2,1 miyon Dollar. Algun dia despues a haci un “huiszoeking” na oficina di Domesa pero no a detene ningun hende. Desde di e prome dia caba tabata bisa cu e homber tras di tur esaki ta un tal “Toro”. Diahuebs ultimo Polis a detene Juan Carlos Toro Rodriguez, sospecha di falsificacion y labamento di placa.
Mester bisa cu na Maart ultimo abogado di e sospechoso deteni a entama un caso di apelacion contra detencion di su cliente, pero a perde y como tal e sospechoso a permanece encarcela.
E accion tabata un iniciativa di Afpakteam Aruba, Ministerio Publico, RST (Recherche Samenwerkingsteam) y KPA. E base di investigacion ta informacion procedente di Hulanda y Corsou.
Mester menciona cu algun siman pasa miembro di Parlamento pa Fraccion di AVP, Robert Candelaria, a manda un serie di preguntanan na Minister Presidente y alabes Minister di Asuntonan General, Integridad, Energia y Innovacion, mr. Evelyn Wever-Croes. E Parlamentario a tuma nota di indicacion cu posiblemente lo a detene Juan Carlos Toro Rodriguez, cu segun medionan di comunicacion, tin lasonan masha estrecho cu e lider di MEP y actual Minister Presidente di nos pais. Specialmente den campaña a nota hopi potretnan hunto, dunando indicacion cu Toro Rodriguez tabata “bodyguard” di e lider politico.
Relaciona cu un investigacion andando relaciona cu contrabanda di oro di Venezuela via Aruba, a surgi pregunta for di Parlamento pa e Minister encuestion. E 14 preguntanan ta varia entre si e mandatario sa cu e persona ta deteni, si e por splica su relacion cu e sospechoso, cu si e Minister Presidente sa cu e mesun persona aki tin un compania di transporta productonan di balor cu tin su oficina na Arulex Building, cu ta e mesun adres cu e bufete di abogadonan Croes-Wever-Tchong?
E Parlamentario no por kere cu tanto problema cu Aruba a haya cu Venezuela pa e asunto aki di transporte ilegal di oro, cu Gobierno di Aruba a nenga di sa algo y awor ta resulta cu un di e posibel sospechosonan principal ta masha yega na e mesun Minister Presidente di nos pais. P’esey e kier sa kico e mandatario tin pensa di haci awor cu e realidad aki a presenta.
E miembro di Parlamento ta spera di por haya contestanan pronto di Minister Presidente Wever-Croes, den un esfuerso pa por haci su trabou di control y supervision riba Gobierno.
