A detene ambos chauffeur den accidente na Palm Beach

Awe marduga Polis a atende un accidente di auto na Palm Beach na altura di Sextacy. Aki chauffeur di un auto marca KIA modelo Picanto tabata lorando na su man robes pa bay na e snacktruck “Chalo Burger”. Chauffeur di un pick-up marca Chevrolet cu tabata bin di abou, a mira e KIA lora su dilanti y a trata di brake. Pero e combinacion di velocidad y caminda muha a pone e intento fracasa y consecuentemente e Pick-up a dal den banda parti patras di e KIA.

Polis a pone ambos chauffeur supla y e test a sali malo pa ambos chauffeur. Aunke tur dos tabata mustra hopi trankilo y bon na tino ainda, toch e test a sali negativo. Polis a splica ambos chauffeur e consecuencia y a detene tur dos pa hiba nan pa Warda di Polis. Ey ta presenta nan dilanti un Sub Fiscal cu mester dicidi riba nan libertad, multa of kitamento di nan rijbewijs. Tur esaki ta depende con halto e nivel di alcohol ta den nan rosea.

Ta bon pa remarca cu na Aruba hopi hende ta kere cu personanan burachi so ta faya e test, mientras cu en realidad tres drinks mes por causa cu hende ta faya e test. Peso, postura, tipo di bebida, si a bebe riba stoma bashi of yen, tur ta un factor diferente cu por influencia e test di alcohol.

Pesey ta bon pa palabra adelanta con bo lo yega cas si bo ta bai sali y dal algun drinks. Ta recomenda pa semper tin un persona cu voluntariamente ta keda sin bebe alcohol pa asina e por ta e chauffeur indica pa asina cada ken yega cas sano y salvo.