A descubri auto horta cerca yiu di abogado

Ta for di dos siman pasa un señora a biaha pa Jamaica y a laga su auto na cas di su yiu muhe. E siman aki, sperando yegada di e wela, e nieto a bay check e auto y a ripara cu ladron a desarma piesa for di e auto. Pero dos dia despues, e ladronnan a sinti dushi y a mira e oportunidad, como tal a opta pa horta e auto completo bay cune for di nan cas, situa na Tanki Leendert # 5. E nieto, preocupa pasobra wela ta biniendo bek Aruba a bay Polis pero a tende cu no por haci nada y pa e mes busca e auto.

Via Facebook a nota cu ta bendiendo piesa cu ta parce di e auto di su wela, cu ta un auto marca Toyota modelo Alteza, cu stuurwiel na man drechi. Nan a bisa e cumprado cu e por cumpra e auto completo of piesa, pa cual el a pidi si e por pasa mira e piesanan su mes.

E bendedo, pura pa deshaci di e auto horta, a bay di acuerdo pa un demostracion. Atrobe e nieto a bay Polis, pero aki nan a bis’e pa e mes bay na e bendedo y si e ta sigur cu ta su auto, pa e ora e yama Polis pa nan yega na e sitio.

Awe merdia e nieto a dicidi pa bay na e cas indica, Sero Blanco 211, net banda di edificio principal di Setar. Asina cu a yega a constata cu berdad e auto aki y e piesanan ta di su wela. A yama Polis y asina cu a yega a haya cooperacion di e doño di cas pa bay paden numa y a bin topa cu un cantidad di piesa di e auto aki, desarma y cla pa bende. E sospechoso, un mucha homber hoben, yiu di abogado Yarzagaray. A detene mesora y a hib’e Warda di Polis pa e duna cuenta di su acto. El a bisa Polis cu el a haya e auto y piesanan for di un otro hende, pues cu no ta e a bay horta e auto y piesanan.

Polis a atende e mama riba e hecho cu si e mes no a ripara cu yiu ta yega cas cu auto cu no ta di dje y cantidad di piesa di auto, siendo cu e hoben no tin ni rijbewijs. Sin duda mayornan por duna un bon man tambe den cuadro di control social riba e hobennan di awendia.