A descubri artefactonan peligroso den area di Balashi pa bora tire di vehiculo

Pa algun dia caba a mira cu tin cierto informacion bayendo rond riba rednan social cu a capta atencion. Di Polis mes no a tende nada tur e dianan cu a pasa.

Mientrastanto diahuebs mainta Polis a manda informacion cu ta confirma e preocupacion di e broadcast cu tabata bayendo rond via wattsap. E obhetonan aki ta wordo usa pa criminalnan. Ta cosnan skerpi traha y cu ta wordo benta riba caminda.
Ta obhetonan skerpi usa pa bora tire di un auto of otro vehiculo. Ta cosnan cu sa wordo usa pa atracadornan. Ora e auto pasa e tire ta bora y obligatoriamente bo ta baha for di caminda. Djey e atracador ta yega y hortabo. Anochi laat of marduga e cosnan aki por sosode. Ya caba den mesun area di Ex Drive Inn atracadornan riba brommer a yega di sigui y purba blokia hende riba caminda cu intencion menos bon.

Pesey mester ta atento. Esaki ta algo cu no tabata existi antes na Aruba pero den otro paisnan si e ta pasa. Mirando e descubrimento aki, Polis a notifica cu ta entre WEB NV, Thrifty y Rotonde Drive Inn a topa diferente di e artefactonan aki. Esnan cu por a mira kende a benta e cosnan aki riba caminda por tuma contacto cu number 11141 y laga un tip anonimo. Esaki ta number ditipline di Polis.