Awe pa 2:30pm un ekipo di Recherche di San Nicolas a presenta den Village pa detene esunnan responsabel pa e acto di destruccion y violencia publico di siman pasa. A yega na e scenario aki despues di algun dia di investigacion y evaluacion di material di video y potret di e sucedido di dialuna 13 di april ultimo, riba Dialuna di Resureccion. A detene mas di un sospechoso awe y ta intencion di detene mas ainda, riba otro di Fiscal di Ministerio Publico.
Tabata dialuna ultimo cu Polis a activa mesora despues cu Bomberonan a yega den Sint Maartenstraat pa paga un candela intencionalmente cendi memey caminda. Bomberonan cu a yega apenas por a baha for di auto ora cu a yobe nan cu piedra y klinkers, destruyendo e glas di e vehiculo, e zwaailicht ariba y varios otro ekipo mas. Mester a warda Polis yega na e sitio pa por a cuminsa combati e candela.
Asina cu a caba, e supervisor di Brandweer riba e truck, a bay Warda di Polis di San Nicolas pa entreha keho di destruccion di propiedad di Gobierno. Tambe, e Comandante di Cuerpo di Bombero a laga Ministerio Publico sa cu mester proteha e “first responders” cu ta sali pa brinda asistencia y ta haya nan bida na peliger dor di hobennan cu tin rabia riba autoridadnan. A keda di atende e asunto aki cu man duro.
E problema a cuminsa ora cu un patruya di San Nicolas a bay atende cu hobennan aglomera den Village. Nan tabata hungando un wega riba television (video games) bou di un afdak banda di e cancha di basketball. Polis a mustra nan riba e hecho cu no mas aglomera y cu nan mester bandona e sitio. Den henter e proceso a detene un di e hobenann, sin violencia.
Pero, e grupo y mayornan na e sitio no ta pensa mescos y a reacciona agresivo contra autoridad. Nan a keha cu Polis a abusa di nan poder y lo a maltrata e hoben. Despues otro testigonan ta sigura cu esey no tabata e caso. Asina cu solo a baha e dia ey a start problemanan den Village, cu cendemento di pallet y taira na candela. Polis a drenta cu varios unidad e dia ey pa pone ordo den e bario.
