Paul Allen, kende a funda cu Bill Gates, e gigante di Microsoft, a fayece dialuna pa 65 aña, pa motibo di un non-Hodgkins limphoma, un cancer di e linfocitonan di sanger, segun su famia a informa.
“Mi ruman tabata un individuo increibel riba tur nivel. Aunke hopi conoci Paul Allen como experto den tecnologia y filantropo, pa nos e tabata un ruman y un omo hopi keri y un amigo excepcional,” ruman muhe di e fayecido, Jody Allen a indica, segun EFE.
“E famia y amigonan di Paul a wordo bendiciona den experimenta su ingenio, clides, generosidad y profundo preocupacion. Na e momentonan aki di perdid ay dolor pa nos y pa hopi otro, nos ta profundamente gradicido pa e cuidado y e preocupacion cu el a demostra tur dia,” el a añadi.
Allen a funda Microsoft cu Bill Gates na 1975, varios aña despues cu e dosnan aki a conoce otro como compañeronan di un scol priva di Seattle. Allen a laga e compania na 1982, despues cu el a wordo diagnostica cu e enfermedad di Hodgkin.
“Mi ta desconsola pa e fayecimento di un di mi amigonan mas antiguo y keri, Paul Allen,” e fundador di Microsoft Bill Gates, a sostene, den un comunicado emiti dialuna. “Paul tabat aun berdadero socio y amigo keri. E computacion personal no a existi sin dje,” el a añadi.
Segun e revista Forbes, cu un fortuna balora na 21.700 miyon di dollar, e fayecido, naci na Seattle na 1953, e tabata e di 44 persona mas rico di mundo.
