A condena Polisnan pa duna informacion secreto na prensa

12752

A pesar cu Abogado mr. David Kock a pone Hues bay pensa un rato riba su ponencianan cu e dos funcionarionan policial en realidad no a viola e regla di secrecia di trabou, na final el a rechasa e ponencianan aki y a declara Gabriel Thiel y Luz Maria Ruiz culpabel di e acusacion cu Ministerio Publico a trece contra nan.

E acusacion contra Thiel ta cu como agente policial, a viola secrecia di su trabao dor di intencionalmente pasa informacion varios biaha pa un periodista den e periodo di 22 di augustus 2016 te 1 di december 2019.

Ruiz di su banda tabatin un acusacion similar, pero cu diferencia den e fechanan. Ta acus’e di, como agente policial, a viola secrecia di su trabao door di intencionalmente pasa informacion varios biaha pa un periodista den e periodo di 31 di december 2016 te 26 di augustus 2018.

Ambos funcionario a acepta e hecho cu nan a haci fout. Un di nan, un funcionario cu mas di 20 aña di servicio, a splica cu simplemente e kier a yuda e periodista, ademas di e hecho cu e no a bis’e algo nobo. Tur cos e periodista tabata sa caba, solamente e tabata kier manera confirma e asunto.

Ruiz di su banda a duna informacion entre otro di un caso di asesinato, con a haya e victima, na e periodista di un website. Den e mensahe hasta e ta bisa e periodista pa no uza e informacion ainda pasobra e ta confidencial.

Fiscal di su banda a mustra riba e importancia pa miembronan di Cuerpo Policial mantene e regla di secrecia ya cu violacion di esaki por afecta e investigacion. Pero Abogado David Kock a bisa cu tur e casonan cu ta papia di dje, a wordo soluciona. Ademas, tur e informacion cu ta bisa a duna e periodista ta informacion cu hasta den Corte a wordo duna durante tratamento di e casonan. E no por compronde of no ta comparti e aspecto di “geheim” cu Ministerio Publico ta enfatisa asina hopi. Hasta e vocero policial a duna informacion. Y a bisa cu ningun caminda ta para cu no por duna informacion na prensa.

Den e caso di Thiel, Ministerio Publico a pidi 75 ora di trabou comunitario, 3 siman condicional y dos aña di prueba. Pa Ruiz, kende tabata forma parti di e departamento forensico, a pidi 125 ora di trabou pa comunidad, 5 siman condicional y 2 aña di prueba.

Tabatin un caso mas contra un colega di nan, Indira Jansen, sinembargo tratamento di su caso no por a sigui pa motibo cu e Procesverbaal di su caso no ta completamente cla.

Hues na final a bisa dun’e mey ora pa studia e ponencianan treci pa despues e anuncia su decision. Sinembargo el a dicidi di rechasa e ponencianan y a bisa cu a haya e dos funcionarionan culpabel di e acusacionnan. Pues e ta haya cu e informacion cu a duna na un periodista tabata informacion secreto. E decision tabata na final 100 ora di trabou pa comunidad of 50 dia cera, 3 siman condicional y dos aña di prueba.

Mester bisa cu banda di esaki, tin e investigacion di castigo disciplinario andando ainda. Pues nan no ta trahando y no sa ainda kico lo ta nan futuro.