A condena fotografo y Polis den caso di walkietalkie di Polis

Awe merdia a haya e Polis, Ari Murray, culpabel den e caso di portofoon policial cu a bay den man di personanan no autorisa. Ta trata di e caso cu a haya e nomber di Kinikini. Den e caso aki tambe ta envolvi e fotografo Ross Tromp y su ruman Luigi Tromp. A condena e trio pa haci trabou pa comunidad.

Polis Murray tabata presente den Corte y a haya apoyo moral di cinco colega di dje. Por a mira na final cu e no tabata di acuerdo cu e decision di Corte pa declar’e culpabel.

Corte a haya e dos prome acusacionnan corecto, esta malversacion (ladronicia den funcion) y soborno (a acepta regalo of promesa) a cambio pa laga otronan uza material di su trabou como polis. Hues den su sentencia a bisa cu na cas di e acusado Ross Tromp a haya portofoon y el a admiti cu esaki ta pertenece na Cuerpo Policial, y cu el a hay’e for di un miembro di Cuerpo Policial, pero no kier a menciona nomber. Despues cu a desactiva e portofoon, a busca otro forma, segun e investigacion, pa e miembronan di prensa haya informacion di sucesonan. Asina e lo a intermedia of convence un Polis, pa uza su portofoon, segun ta para den e proves-verbaal.

Pero e Polis ta nenga esaki categoricamente. E ta nenga di a entrega e portofoon na e rumannan Tromp. Pero, Hues a bis’e, tin pruebanan obhetivo menciona den e sentencia, cu ta conden’e. Entre otro tin mensahe di Ross Tromp manda riba e celular di trabou di e funcionario policial Murray encuanto pago. Polis Murray a bisa cu ta uza su nomber pa laga un colega di dje for di e investigacion.

Hues a bisa cu no mester lubida cu Polisnan tin un rol importante den comunidad y mester por tin confiansa cu nan ta cumpli cu nan tareanan manera ley ta prescribi. P’esey a bay di acuerdo pa declar’e culpabel. El a haya seis luna condicional y tres aña di prueba. Banda di esaki a dun’e 240 ora di trabou pa comunidad of 120 dia cera.

Pa e rumannan Tromp, kendenan tambe el a declara culpabel, a duna un castigo igual cu e demanda. Pa Ross Tromp e tabata 186 dia di prizon di cual 180 dia ta condicional y 3 aña di prueba. Banda di esaki, 240 ora di trabou pa comunidad of 120 dia cera. Y pa Luigi Tromp, e castigo tabata 2 luna condicional y 3 aña di prueba; 180 ora di trabou pa comunidad of 90 dia cera.