A cera hende muhe cu a scupi Polis y bisa cu e tin Coronavirus

Un hende muhe di 49 aña di edad procedente for di Utrecht a presenta dilanti Hues di Midden-Nederland y a ricibi un castigo di prizon di 4 siman, di cual 2 siman ta condicional, pa menasa un Polis cu morto y maltrato. Siman pasa e muhe a gara un Polis na garganta y despues a scupi’e den su cara bisand’e cu e ta pashent di Coronavirus.

Complex di cel
Diaranson ultimo Polisnan a bay cas di e señora despues di un melding. Pasobra cu e no a reacciona, a habri e porta pa bay paden. Nan a haya un holo fuerte di alcohol. Despues di a papia cun’e, el a bisa e Polis “mi ta bay caba cu Bo” y a lanta gara un di e Polisnan na garganta. Mas despues den cel e muhe a bisa cu e ta pashent di Coronavirus y a scupi e Polis femenino den su cara. E muhe a bisa Hues di no ta corda kico el a haci diaranson pasobra e tabata bou influencia di alcohol.

Mal hecho
E Hues ta haya cu e señora a faya for di a maltrata un Polis eherciendo su trabou, cu na e momentonan aki mester conta cu tur apoyo. E Polis tambe mester aplica distanciamento social awo, pues no por tin contact cu su famia pasobra no sa si e ta contagia. Cu e muhe a bisa di no tin Coronavirus y no tin niun sintoma no kiermen nada. Segun e Fiscal, mester cualifica e scupimento como menasa, pero e Hues ta haya cu esaki ta cualifica huridicamente como maltrato. Separa di castigo di prizon e muhe mester paga daño perhuicio tambe!

Otro a scupi manager den supermercado
Un homber di 28 aña di Lelystand a presenta diabierna dilanti Hues tambe. A condena e homber na 40 ora di servicio comunitario pa a scupi manager di un supermercado. Segun e victima, despues di ora di cierre, e homber a drenta tienda pa cumpra cerbes. Na momento cu e manager tabata guia e homber p’e sali, el a scupi’e! Polis a detene e homber y a cer’e p’e por presenta den Corte. Door di a scupi el a laga e victima cu hopi inkietud. E Hues a cualifica e scupimento como maltrato. Pa motibo cu e homber no a comete actonan di violencia recientemente, e homber no a haci uzo di e situacion di Coronavirus, e Hues a scoge pa dun’e servicio comunitario. Tambe e homber mester paga e manager di supermercado daño y perhuicio.