Awe mainta algo prome cu 10:00am a activa Cuerpo di Bombero y Polis pa un cas na candela den Weg Rooi Hundo na San Nicolas. Na e sitio a resulta cu mas bien tabata un cas bandona. Ta parce cu e candela tabata intencional, pa cual Polis a patruya den e area pa mira si por a topa cu e posibel sospechoso di a cende e candela, pero sin resultado.
Ultimo dianan Cuerpo di Bombero ta notando un tendencia nobo di cendemento di candela intencional den varios bario y districtonan. Esaki ta pone un presion adicional riba e Bomberonan, cu ta haya nan ta core yega na candela cu despues ta resulta di ta intencional. No solamente e ta un gasto innecesario pero tambe e coremento duro di Bomberonan pa yega na e “supuesto” candela ta trece trafico na peliger, sin cu tin un motibo real.
