Minister Dangui Oduber tabata presente pa celebra “Spanten Bier” pa e edificio nobo di utilidad, caminda ta bay abastece tur coriente pa Aeropuerto. No tabata mucho siman pasa cu e Minister a presencia e Groundbreaking y awo a yega e punto di mas halto den construccion, den un celebracion cu e contratista, trahadonan y ehecutivonan di Aeropuerto.
E Minister a felicita gerencia di Aruba Airport Authority NV y tur esunnan participando na e proyecto aki, cu ta masha importante pa nos pais, pa nos turismo y nos economia. E ta un proyecto cu lo genera entrada, mas empleo, lo stimula nos GDP y sigur yuda engrandece nos turismo tambe.
Na e momentonan aki Aeropuerto a yega su capacidad maximo. Pero teniendo cuenta con hopi nos turismo a crece y cu miras pa futuro, e proyecto aki di expansion di nos Aeropuerto ta importante. Ta bay traha na un manera mas eficiente pa mehora e servicio cu ta brinda na pasaheronan yegando y saliendo. Aeropuerto ta e prome y ultimo impresion cu e turistanan ta haya di nos pais.
CEO di aeropuerto, James Fazzio a expresa cu e evento aki ta algo ceremonial, caminda cu e edificio a yega su punto mas halto. Pa AAA, esaki ta un meta importante y un proyecto importante pa tanto aeropuerto como e pais. E edificio di utilidad ta un di e prome partinan importante di e aeropuerto.
E proyecto aki di expansion di nos Aeropuerto ta planea pa keda cla na aña 2024. Ta un inversion total di mas cu mey biyon florin (Afl. 500.000.000,00) den e proximo 4 añanan. Ora e ta cla, Aeropuerto ta sigur cu e lo mehora e experiencia di e usuarionan, cu tecnologia moderno pa facilita y evita filanan largo.
Tambe nan lo tin un sistema nobo y computarisa pa maneha ekipahe. Lo mehora sistemanan di siguridad, como tambe e facilidad di pre-clearance. Lo crea miho oportunidadnan di compra, esta tuma miho bentaha di oportunidadnan comercial na Aeropuerto, como tambe un miho “Gate Capacity”.
Cantidad di turistanan
Actualmente Aeropuerto di Aruba ta procesando 2.6 miyon pasahero pa aña. Tur cos ta depende si bo kier enfoca riba e experiencia di pasahero, ta trahando un Aeropuerto cu por maneha 3000 pasahero pa ora. Segun Fazzio, e industria di aviacion tin e tendencia di crea un periodo piek na Aeropuerto, den cual 60% pa 70% di e vuelonan ta yega y sali den un margen di cinco ora tur dia.
