A celebra Dia di Independencia di Merca na Aruba

Apesar cu no ta un dia di fiesta pa nos aki na Aruba, pero como cu nos ta un isla turistico y pa nos bishitantenan sinti nan mes na cas, a bira un custumber cu varios fiesta cu nan ta festeha, manera Halloween, Labour Day, Cinco de Mayo etc. tambe ta celebra aki na Aruba.

Den e caso aki, ayera diahuebs dia 4 di Juli tabata Dia di Independencia di Merca, pa cual motibo a celebr’e na un manera toch casi similar cu Merca. Cu hopi vuurwerk.

Reporteronan di 24ora.com tabata na Mambo Beach, entre Divi Tamarijn y Divi Divi Hotel, unda varios bishitante di Merca a celebra nan “4th of July”. Hopi di nan conoce Aruba caba y cada biaha pa nan ta un experiencia y sigur nan lo keda bin bek na nos isla feliz.

A celebra Dia di Independencia di Merca na Aruba

A celebra Dia di Independencia di Merca na Aruba. Click link pa mas https://24ora.tv/2FUTR3M

Posted by 24ora on Friday, July 5, 2019

Un di e turistanan, Briella, a haya e vuurwerknan masha leuk mes y cu ta casi mesun grandi cu nan tin na nan propio pais. El a comenta cu sigur e lo bin bek pa un proximo bishita. Robert y Jill D’allesandro for di Bethlehem, Pennsylvania, tambe tabata tey na Mambo Beach, caminda cu nan a celebra nan 4th of July. El a comenta cu pa bin Aruba ta hopi facinante y ta aprecia cu na Aruba tambe nan ta celebra e Dia di Independencia di nan Pais. Pa Jill e ta un extra celebracion mirando cu tabata su cumpleaños. Robert y Jill a comenta nos cu sigur sigur nan lo bolbe bek Aruba pa nan vakantie.

Dia di Independencia di Merca

Kico nos ta compronde bao di Dia di Independencia di Merca? Manera cu nan ta yam’e, “4th of July”, ta un dia nacional, unda cu nan ta conmemora e declaracion di Independencia di Merca riba dia 4 di juli 1776. Riba e dia ey congreso continental a declara cu e diestres colonianan Mericano liber di e monarkia Britanico. A dicidi e tempo ey cu nan ta uni, liber y estadonan independiente. E congreso a vota dos dia prome, esta dia 2 di juli, pero e declaracion a keda cla dia 4 di juli. Dia di independencia ta asocia cu tiramento di clapchi, paradanan, BBQ, carnaval, picnic, conciertonan, weganan di baseball, reunion di famia y discursonan politico. E ta e dia nacional di Merca.