Tabata alrededor di 8:20 pm ora cu un auto marca Kia modelo Cerato color blanco a bula di un banda caminda pa otro. E tabata biniendo for di pariba, pues rotonde na Tanki Leendert direccion rotonde Ponton riba Watty Vos, ora cu pa un motibo of otro e chauffeur a perde timon di e stuur y accidenta contra di e parti memey cu ta separa e caminda, pa djey subi e pida sero y keda pega otro banda di caminda.
Daño material tabata basta, no solamente na e auto pero tambe na e pida cu ta parti e dos vianan memey caminda. Polis y ambulance a presenta na sitio pa atende cu e accidente y tambe pa brinda atencion medico.
E chauffeur no tabatin necesidad di asistencia for di e paramediconan riba ambulance. E polis di trafico a documenta e accidente aki mientras a notifica e personal di Watty Vos pa atende cu e daño na e caminda.
