A bula cabes di Gerald Vingal na Migracion

Manera cu nos a informa den forma di primicia na Januari ultimo, semper a biba den cabes di e Minister nobo di Husticia y Integracion pa haci cambionan drastico den Migracion Aruba. Na momento cu nos a informa di su deseo, expresa dor di su Consehero na dos Hefe di departamento, Migracion tabata un di nan, mesora Minister Bikker a sali desmenti y a hasta cataloga nos noticia como “fake news”. Algun siman pasa, ya caba el a duna Trudy Hassel e autoridad pa firma na Migracion y Warda nos Costa, mientras cu awe mainta el a anuncia cu Vingal no ta na Migracion mas y cu el a institui un “Management Team”.

Ta parce cu esaki lo bira e “modus operandi” di e Gobierno aki, di cual na aña 2005, Andin Bikker y PDR a campaña fuertemente contra MEP cu e slogan di “Bula nan Cabes”. Awe despues di 13 aña, e mesun formula ta riba mesa y di cual den Husticia y Integracion e ta birando un “trend”.

Den pasado a ofrece Gerald Vingal, kende a haci cambionan structura den Migracion Aruba, pa un otro funcion, entre otro como Consehero di e Minister. Ta parce cu den Migracion tin dos campo di bataya, un banda ta simpatisadonan di MEP y e otro di POR. Vingal ta memey y den nan tin grupo yega na Gobierno (Minister) cu ta purba di tur forma pa pinta e Director malo of ta cuestiona e proceduranan interno, di cual mayoria ta impone dor di Departamento di Recursonan Humando (DRH) di Gobierno mes.

Pero despues di varios intento y den apenas 6 luna di tempo, a logra yega na un acuerdo cu Vingal pa e acepta un reto nobo den un Comision di Mediacion di LTU (Ley di Admision y Deportacion). Minister Bikker ta keha cu tin un atraso grandi den maneho di DIMAS, for di cual declaracion ya por tin un bista caba den ki direccion e lo sigui awor, pa cual e comision nobo aki lo mester yuda sostene DIMAS. E ta hayando hopi keho ultimamente cu permisonan no ta sali na tempo y cu tin demasiado formalidad na DIMAS.

E cambio na Migracion Aruba ta encera cu Gerald Vingal ta bandona e puesto di Director pa bay den un Comision na disposicion di Minister Andin Bikker mientras cu na su luga a institui un “Management Team” encabesa pa Comisario di Polis, Trudy Hassel y Inspector di Polis, Icho Matos. E ultimo aki tin hopi experencia den ramo di leynan di LTU, specialmente pasobra e ta trahando pa hopi aña caba sea na Imigracion mes tempo el a resorta bou di Polis y awor na Grens Bewaking, esta Polisnan na Aeropuerto.

Tocante Migracion Aruba

A introduci e ofishi di ambtenaar di Inmigracion dia 19 di maart 1969 bou di Cuerpo Policial di Antias, den e departamento “Sectie Vreemdelingen Politie”. Dia 1 di september 2002 a los e departamento for di Cuerpo di Polis y a inclui den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion. Entrante 1 di september 2017, oficialmente Instituto Alarma y Siguridad Aruba (IASA), funda tempo di Minister Rudy Croes, a stop di existi. Na su luga a funda Migracion Aruba cu ta atende tur asunto di “Grenscontrole” na Aeropuerto y wafnan, mientras cu Warda nos Costa ta ehecuta “Vreemdelingentoezicht”. Servicio di Inmigracion ta consisti di mas o menos 60 empleado mientras cu Warda nos Costa ta conta cu mas o menos 17 empleado.