Durante e conferencia di trabou ‘Exito di estudio di studiante Caribense’, cu a tuma luga siman pasa na Universidad di Aruba, a diseña un pakete concreto y structura di medida pa aumenta exito di estudio di studiante Caribense. E resultadonan di e conferencia ta wordo ofreci bou di e nomber nobo “Strategic Education Alliance (SEA)” na e “Vierlandenoverleg Onderwijs, Cultuur en Wetenschap” ministerial cu ta tuma luga na december.
SEA ta consisti di e representantenan di e islanan Aruba, Hulanda Caribense (Bonaire, Saba, St. Eustatius), Curaçao, St, Maarten y Hulanda y e partidonan den enseñansa di e paisnan aki. Nan tin un aña y mey caba ta ocupa nan mes cu mehora exito di estudio di studiante Caribense. Ta asina cu gran parti di e studiantenan aki no ta termina e estudio den exterior. E conferencia di trabou na Aruba tabata organisa pa desaroya e siguiente pasonan concreto.
Mas medida concreto y structural
E subtitulo di SEA ta “A bright futurefor Caribbean Students”, un bunita futuro pa studiante Caribense. Pa sigura e futuro ey, segun SEA, ta necesario un plan strategico cu ta fortifica e infrastructura pa enseñansa superior y secundario. Banda di esey un programa conhunto di mobilidad den reinado mester haci mobilidad den reinado posibel riba nivel di mbo, hbo y vwo. SEA kier prepara tambe e studiantenan riba e islanan miho pa loke ta nan escogencia di estudio. Esaki door di un ‘Pre-Academic Year’ pero tambe door di incorpora e medionan moderno, manera app y bril VR. Por haya tur recomendacion riba www.strategiceducationalliance.org.
Importancia di cooperacion di termino largo
Segun SEA un acercamento structural y mehoracion di exito di estudio di studiante Caribense ta rekeri esfuerso y compromiso di tur partido. E esfuerso y compromiso aki lo dura algun aña. SEA lo haci e peticion na e ‘Vierlandenoverleg’ pa elabora riba e compromiso di termino largo aki y existencia di SEA y establece esakinan.
SEA lo pidi e ministernan envolvi di e ‘Vierlandenoverleg Onderwijs, Cultuur en Wetenschap’ ministerial tambe pa percura p’e sosten financiero y e medionan cu ta vigila pa realisa e palabracionnan haci.
