Diabierna atardi pa mas of menos 6:30pm bisiñanan na Madiki a nota un adicto ambulante cu di leu tabata mustra di ta malo. Desde mainta e no tabata reacciona. Un habitante di Madiki a expresa cu desde algun dia caba e adicto ambulante tabata keha di dolornan p’esey a dun’e pildo y buscuchi.
E adicto ambulante a pega soño riba e sofa bou di palo. E habitante a pasa y mira cu e adicto ambulante no tabata move. Di biaha el a yama polis y ambulance pa informa nan di e situacion. Despues di casi binti minuut ambulance a yega na e sitio y di biaha e personal medico a cuminsa brinda asistencia.
Nan a opta pa transporta e adicto ambulante p’e por haya mas tratamento na hospital. Den e ultimo dianan aki, ambulance ta tarda un tiki y debi na e situacion di COVID-19. Polis mes no a presenta na e sitio ora cu a pidi nan asistencia.
