Diamars atardi alrededor di 6:05 pm a sosode un accidente un poco mas pariba di rotonde Sasaki. Aki ta caminda cu un grupo di amigo den un Suzuki Samurai a perde control, dal contra di un palo di luz y keda pega den mondi. Ta trata di por lo menos cinco hoben cu a core bay na pia y laga e auto atras.
Por lo menos un di e hobennan, polis a señal’e den un Nissan March, cu no ta descarta cu pronto lo pone man riba dje. Debi cu tin un compleho cerca, e camara di siguridad a capta tur nan movecion.
E palo di luz a ricibi basta daño, personal di Elmar a presenta pa atende cu e palo di luz. A dura por lo menos dos ora pa nan a atende cu e problema aki. Na final polis di trafico a presenta pa documenta e accidente aki, a takel e auto pa warda di polis Balashi pa pendiente investigacion.
