Diaranson anochi a tuma luga un caso di atraco riba dos hende grandi na Yucuri den nan propio cas.Segun informacion compila, ta trata di tres persona hoben di habla Hispano cu a drenta den e cas y a atraca e pareha. Nan a drenta den camber y entre otro nan a horta su renchi orea y a coba den cashi.
No ta conoci kico mas nan lo por a horta. Polis ta na e sitio, a compila e datonan y papiando cu e victimanan. No tabata tin arma uza ni herido.Un bisiña a ripara cu tabata tin problema. Ora el a wak e auto para, y manera e tres malhechornan a core drenta den auto, el a manda un shovel den direccion di e auto, un sedan preto y kibra e windshield patras.
Ya caba melding a bay pa e otro patruyanan cu un descripcion di e auto. Si por tuma nota di un auto preto cu tres persona aden cu bentana di glas kibra, tuma number y modelo di auto y informa polis mesora.
Un rato despues polis top’un vehiculo cu ta cuadra cu descripcion di e supuesto auto uza den e atraco. A topa cu ne na altura di e dam na Tanki Leendert. E auto ta marca Chevrolet, color preto y sin plach’i number, e glas patras tabata kibra. Recherche di Sta. Cruz a presenta y a confisca e dicho auto, a takel e auto y hib’e ward’i polis pendiente mas investigacion.
