A asesina Camilo Sosa den area turistico

Tabata algo pasa di 3:00am cu a bati alarma na Polis pa un hincamento formal riba nos corridor turistico, net patras di Sand Bar, cerca di Brickel Bay Resort. Na yegada di Polis a constata cu tabatin un hoben benta na suela den un plas di sanger y no tabata reacciona. Su amigonan a hinke den auto y hib’e Hospital urgente, unda e ekipo di reanimacion di Hospital, consistiendo di nursenan profesional di SEH y ICU a bay den accion, pero sin resultado. Pa 3:24am, Dokter di Spoed Eisende Hulp (SEH) di Dr. Horacio E. Oduber Hospitaal a constata morto di Camilo Alejandro Carreño-Sosa, naci dia 28 di september 1995, pues di apenas 22 aña di edad.

Polis keto bay ta investigando kico por a pasa cune cu a conduci cu nan a hink’e cu un obheto skerpi, net bou di su brasa. Claro cu den e area di hotel eybanda tin varios camara cu awor mester sirbi di evidencia pa saca afor kico a sosode na e sitio di crimen.

Testigonan a conta nos na e sitio cu parce tabatin un pelea na Sand Bar y cu a cana bay patras. E victima lo a habri auto cla pa bay ora cu e sospechoso a bin bringa cune na auto. Dado momento a mira con e hoben a sak den otro y cay.

E sospechoso parce tin cabey semi rasta y dado momento a kita flanel y lomba sunu a bula den un pickup color cora kima y a bandona e sitio di crimen. Testigonan tin un bon idea di kende e sospechoso ta, pero no ta sigur si a logra nota e number di auto.

Mester menciona cu durante investigacion di Polis na e sitio di asesinato, a topa cu e auto di Camilo Sosa habri. Den e auto a topa cu grinder y otro ekiponan uza pa procesa cigaria di Marihuana.

Camilo Sosa a atende Colegio San Antonio na Santa Cruz y sigui despues pa Colegio EPI. Polis a bay cas di su mayornan den marduga, pa pidi nan bay Hospital pasobra nan yiu tabata envolvi den un hincamento. Tabata momentonan masha doloroso pa e mayornan, pa yega SEH y topa cu un realidad asina tristo. Hopi forsa na famia.