Awe nochi algo prome cu 8:00pm a sosode un caso di tiramento na altura di Julio’s Bar na San Nicolas. Na e sitio Polis a topa cu varios huls na suela y un situacion masha caotico mes. Na suela tabatin un homber benta abou cu no tabata duna señal di bida. A topa cu su auto tambe, un KIA Rio color cora cu number A-61743.
Testigonan for di Julio’s Bar a conta cu tabatin un Polis na civil coriendo na pia y a scucha por lo menos tres tiro. Esunnan den e bar a pensa cu tabata klapchi pero a mira e victima na careda y despues a cay den veranda di un cas net eytras.
Pa 8:50pm Dr. Brit Croes a constata morto di Harmon Girigorie, naci na Aruba dia 21 di december 1985. E tabata coordinador y/of bodyguard di Minister Chris Romero. E ta bay laga atras un yiu y su pareha. Mester bisa cu den pasado Harmon mes tabata un conoci di husticia, ora cu el a los diferente tiro riba Warda di Polis di San Nicolas. A consider’e como “vuurwapengevaarlijk”. Su amigonan a conta cu e ultimo añanan el a drecha su bida hopi y desde e Gobierno nobo di asignatura MEP-POR-RED, el a bay traha den Cocolishi.
For di Ministerio di Transporte y Comunicacion, a informa cu e defunto berdad tabata un “Beveiligingsmedewerker” y un persona di confiansa di Minister Chris Romero. E ultimo aki ta hopi conmovi cu e noticia y ta convivi cu famia di e defunto den e momentonan dificil aki.
Vocero di Polis, Liliana Rasmijn a haci un apelacion na comunidad, na tur esunnan cu tabata na e sitio of eybanda, cu por sa mas con e tiramento aki a sosode y kende(nan) tabata envolvi, pa yama tipline di Polis na 111-41 pa suministra informacion confidencial.
