Despues di cambio di Mando den Cuerpo Policial Aruba ta haciendo diferente cambio. Alto Comisario Andrew Hoo a apunta Inspector Primera Clase, Silvio de Mey, como su “Chief of Staff”. Su ultimo funcion tabata Districtschef interino na districto di Santa Cruz.
Silvio de Mey conoce Cuerpo Policial hopi bon, cu hopi dedicacion y pasion. Cu un amplio conocemente den Husticia y cu diferente diploma riba su nomber manera “Propedeuse bul in rechtsgeleerdheid”, “Doctoraal bul in rechtsgeleerdheid” (Titel mr. in de rechten), “Meesterproef hulpofficier van justitie”, Training Personal Leadership y Workshop Integrity.
Silvio de Mey semper a sigui studia. Na aña 2009 pa 2012 el a dedica 3 aña na Politie Academie na Hulanda. El a logra su diploma di “Executive Master of Tactical Policing major in General Leadership”. Ta bon pa bisa cu Silvio de Mey y e actual Alto Comisario Andrew Hoo ta e unico personanan na Aruba cu tin e titulo aki. Un titulo cu tin amplio conocemento den e tereno di Husticia pero tambe den e organisacion policial. Cu e combinacion aki lo por spera hopi cambio positivo pa e organisacion.
Silvio de Mey awor tin un tarea importante pa sostene e maneho di e Alto Comisario nobo y percura pa tur nanishi ta den e mesun direccion. Claro cu tin hopi reto pero cu un vision firme y un plan di maneho, ta convenci cu lo logra supera tur. Cuerpo Policial Aruba ta conta cu 600 homber y muhernan balente cu awor lo nota cambionan pa un miho Cuerpo Policial, mas profesional y mas integro.
