A anuncia multa di mil florin minimo pa esunnan cu no respeta cuarentena of isolacion

6927

A escala e cantidad di test cu ta haci pa dia formalmente pero tambe e control riba esunnan cu mester ta den isolacion of cuarentena. E resultado di e esfuerso di mas test pa dia ta haci cu e cantidad di casonan positivo tambe ta aumenta; pa awe den 1060 test cu a haci a detecta 133 caso nobo. Per capita Aruba ta un di e paisnan cu mas test ta haciendo pa dia na mundo. 

Te ainda tur esunnan cu a test positivo den e siman aki no tin mester di wordo interna den hospital y DVG y Gobierno ta desea nan un pronto recuperacion na cas. Den e proximo 2 simannan lo sigui registra casonan di esunnan cu na e momento aki ta den estado di encubacion y cu ainda no tin sintoma. Segun estadisticanan lo mira e efecto di e medidanan tuma te aki dos siman, si esunnan den isolacion, cuarentena y tambe comunidad engeneral cumpli cu e instruccionan.

Na e momento aki tin un total di 279 persona positivo y isola, tambe tin un cantidad substancial di personanan den cuarentena debi na contacto cu esunnan cu a test positivo. Pa por stop e virus di plama ta importante pa tur esunnan concerni cumpli tambe cu e intstruccionnan y mantene nan mes den isolacion of cuarentena. 

Pa GARANTISA cu e personanan concerni ta cumpli, Polis y DVG a reenforsa nan teamnan encarga pa controla esunnan den cuarentena y isolacion. Ta haci yamada na tur persona cu a test positivo of esunnan cu DVG a pone den cuarentena, pa nan atene nan mes na e condicionan. “Task Force” lo controla cu mas frecuencia y lo yega cerca bo na bo cas cualkier dia y durante cualkier momento di dia. Prome cu e Task Force yega nan lo yamabo y si bo no contesta bo telefoon of na momento di nan yegada nan no por localisa bo, lo haya un boet cu ta cuminsa na fl 1000,-. DVG ta spera cu tur hende cumpli pa nan recuperacion por tuma luga sin complicacion y comunidad tambe por ta trankil y proteha.