Tabata tin un situacion cu a surgi recientemente cu mester a activa Departamento di Calamidad, ora cu Kustwacht a intercepta un boto drentando Aruba cu 35 hende. Ta algo cu no sa pasa. Rino Hermans, hefe di e departamento, a splica cu manece diadomingo, Kustwacht a yama y bisa cu nan a intercepta un boto cu e cantidad di persona ya menciona.
Tin un plan cu ta data di 2006 cu momento intercepta mas di 20 hende cu tin intencion pa keda Aruba di un forma ilegal of pa motibonan di e situacion di Venezuela, mester activa Rampenbureau. E departamento aki tin e rol di coordina, door cu tin asina hopi dienst cu lo bin hunto pa atende cu e situacion.
Door di esey, diadomingo mainta a activa e departamento, mirando cu e cantidad a pasa mas cu 20. Esey no ta nifica cu e departamento tin e parti operacional. E parti operacional di cada dienst ta keda den nan mesun man. Departamento di Calamidad solamente ta coordina conforme e plan, kico ta bay pasa y si e procesonan cu e departamento ta encarga cun’e, loke ta prescribi den e plan, ta pasando door di dje y esey ta loke ta notifica prome minister, kende ta e Opperbevelhebber di e situacion di Massamigratie.
Aki tin tur e departamentonan, DVG, Sociale Zaken pa opvang, IASA, Guarda nos Costa, Polis y DOW a bin pa transporte. Tin un coordinacion eynan y e plan ta bisa e momento ey, Rampenbureau tin e coordinacion general. Nan no tin e maneho, pero si pa pone tur proceso “in place” y pa nan rol den e procesonan.
Con tur cos a cana
Diadomingo mainta, conforme e plan, tur cos a cana bon. E plan a funciona. Logico, despues di cada incidente, Rampenbureau tin e tarea di adapta e plan conforme cu cambionan cu tin di maneho y di ley.
Tin un cambio di ley di dia 3 di juli cu minister di husticia a introduci. Esey ta nifica cu e mester ta hinca den e plan di accion en caso cu e mester ripiti atrobe. E procesonan riba su mes a cana bon y conforme plan cu tabata tin.
Tur dienst a coopera perfectamente, segun Rino Hermans.
Plan di 3 di juli
Hermans a splica cu e plan ta e Schiphol model. E personanan tin 28 dia pa por pasa door di e proceso administrativo en caso cu nan mester pidi asilo. E ta yama tambe e ley di 3 di juli. Si ta bon, nan ta keda paden, tanten cu e proceso administrativo ta bezig, nan tin 28 dia pa keda deteni.
Asilo
No ta tur hende a pidi asilo. A keda dos persona so cu a pidi. E prome melding tabata cu tur 35 hende a pidi asilo. Ora cu a yega pier a keda solamente dos. Segun Hermans, Guarda nos Costa y DIMAS tin e parti aki. Nan por laga sa cuanto hende a pidi asilo y cuanto ta den proceso. E no ta cay mas bao di Rampenbureau.
Gobierno su rol
Gobierno tin e responsabilidad di scucha esnan cu ta pidi proteccion. Esey ta e proceso administrativo cu DIMAS ta encarga cun’e. Pa e proceso aki, tin e detencion, cu Guarda nos Costa ta encarga cun’e. Si Gobierno tin nan, nan ta encarga cu e proteccion, esta duna alberge, cuminda, etc.
Deportacion
Pa loke ta deportacion, esaki ta den man di Guarda nos Costa. Rampenbureau su rol ta caba na momento cu e baha bek na dos, cual a caba di coordina. Tur e resto ta bira e parti hudicial cu ta Dimas y Guarda nos Costa su parti administrativo.
Mas tipo di embarcacion
Si mas embarcacion yega Aruba carga, segun Hermans, e ora lo bira momentum. Rampenbureau tin e ora e autoridad pa conseha minister, pa nombra un otro centro di detencion cual tin cu prepara pa cumpli cune. Esaki ta e parti administrativo, cu ta bay tin mester di e espacio pa evalua si nan ta bin na remarca si of no. Esey tambe ta den e plan.
For di awo caba, Herman a menciona cu e no ta predetermina unda lo bay y kico mester haci. Na momento cu haya melding for di Kustwacht, e mesun proceso ta sigui. Si ta mas cu 20 persona grita pa asilo, e mesun proceso ta bay cuminsa. Si tin un minimo di capacidad di detencion, mester tuma un decision. Ey por mira unda cu Rampenbureau su rol ta bin aden.
Pero si surgi un situacion manera esun di diadomingo, cu a keda dos so cu a pidi asilo, e ora Rampenbureau ta exclui atrobe, pasobra ta papia di e 20nan cu ta pidi un proteccion. E no ta papia di ilegal. Esey ta full un proceso hudicial.
Cruz Cora
A haya un notificacion for di Cruz Cora cu nan a cera nan shelter pa motibonan financiero y capacidad di opera e shelter. Pero esey no ta influencia e plan en principio. Pais Aruba tin un plan pa carga su responsabilidad. P’esey ta haya cu Rampenbureau ta bin aden pasobra esey ta un di e tareanan principal di Rampebureau cu tur e procesonan cu tin y tambe tin e parti logistica pega na dje. Si e no tey, pa bay ministerraad y pidi autorisacion pa tuma cierto decisionnan riba e nivel ey pa tuma un luga y haci’e un detentiecentrum den e caso aki.
