A​rmand Hessels: E reunion di parlamento ta bay den historia como un fracaso

2331

​”​Diaranson ultimo, mi a sigui e ehempel di casi 10.000 Rubiano, cu no kier a perde e revelacionnan historico ‘live’ di un ministro tocante algun (ex-)colega ni pa nada. Pa mi tawata di prome biaha cu mi a atende un reunion publico bibo, aunke sea ‘on-line’. Mi a keda impresiona profundamente. Ki fracaso y desilusion! Si esaki, tumando na cuenta e tema, mester representa un di e reunionnan mas importante den historia di Aruba, anto e ora ey mi no por ni imagina mi mes con lo ta den caso cu ta trata di tema menos yamativo​”, asina Armand Hessels a skirbi den su relato.​

Diberticion popular

Tawata parce cu tur orador kier a scucha nan mes dilanti di un publico asina grandi y p’esey a keda ripiti pregunta y ponencia cu orador prome cu nan ya caba e trece dilante extensamente. Den esey nan a logra di crea mas confusion cu claridad. Claro, cu algun excepcion. P’esey mi a yega na e conclusion cu mester a keda palabra internamente pa keda alarga e suspension cerca e publico na cas te un maximo. A pesar cu mi mes tawata testigo, mi no por acepta como normal, corda como posibel, cu ‘representante di pueblo’ adulto y bon paga, na un manera satanico y den combinacion cu suspension largisimo, a keda postpone eternamente e show principal. Asina el a faya asta como diberticion popular!

“Señor Presidente”

Tawata obvio cu e Parlamentarionan no tawatin mucho cos importante di bisa. Esey a sali na cla cu e uzo ripiti, hopi iritante y te cu fada, di “Señor Presidente”. Hopi a uz’e na comienso Y (!) fin di cada frase, mientras algun orador riba dje varios biaha mas den cada frase mes. Aparentemente pa yena e tempo di ‘oracion’ cuantitativamente, pa falta di miho. Hopi canson y sin ningun sentido. Un biaha so “Señor Presidente” na comienso di un discurso ta suficiente. A menos cu mester yama atencion di e presidente pa motibo cu el a pega soño, locual den e circumstancianan actual no lo ta nada straño. Y pio di tur cos ta cu nos ta paga masha hopi placa p’esaki! Pero pa e recipientenan esaki ta ‘easy money!’

Perdemento di tempo

E presentacion aki a fortifica mi conviccion cu Parlamento como tal den nos democracia, basa riba partido politico, ta placa tira afo. Ta enfoca riba show, riba profilacion y ganamento di punto cerca publico, posiblemente den e speransa pa asina alarga e estadia den Parlamento. Esaki por funciona cerca espectador cu di berdad no tin nada otro di haci y cu ya caba a perde realidad di bida for di bista. Pero pa cualkier otro cu ta para cu tur dos pia den bida y cu su tempo ta valioso, esaki tawata nada mas cu un ‘waste-of-time’ total. En realidad nos Parlamentarionan mes lo ta experencia esaki tambe, tumando na cuenta e percentahe di asistencia hopi abou den e reunionnan di comision.

Educativo

Aunke lo anterior lo por duna un impresion un tiki negativo, locual di ningun manera ta mi intencion, pa mi e evento aki tawata hopi educativo. Si di berdad esaki mester representa nos organo legislativo y di control mas halto, e ora ey mi ta compronde por fin ta con por ta cu asina hopi caso den pasado a bay robes y te dia di awe no a haya solucion. Caso manera e Ley di Financiamento di partido politico, Ombudsman, control real di gobierno pa medio di cuenta anual, aproba pa accountant cu ta warda algun decada caba riba tratamento. Pues ta duna e impresion fuerte cu di ningun manera Parlamento ta enfoca riba resultado. Mas bien ta fiha riba mustra mas sabi cu e oponente (locual no ta mucho dificil) y pa tir’e un par’a. Esey t’e cos! Y naturalmente como consecuencia polarisashon den comunidad, cu ta para garantia di fanatismo di clan/partido.

‘Overhaul’

Esaki simplemente tawata un prome impresion. Mi ta spera cu mi ta ekiboca, locual mi ta duda, tumando na cuenta e cantidad grandi di reac​ci​on desespera di ‘publico’ durante e transmi​ci​on riba Facebook. Si esaki ta corecto, ta parce mi mas cu tempo pa un ‘overhaul’ completo di nos sistema politico.