Un total di 90%, un cifra basta halto y tin cu bisa cu e alumnonan a haci nan best y por mira e fruto awo cu nan tin nan diploma den nan man. Directora adhunto, Raquel Lampe por mira un aña hopi exitoso, cu alumnonan den e prome periodo a logra 85% y den di dos periodo a logra 90% como final.
Esaki ta pone Filomena College como esun mas halto di e graduadonan na Aruba. E scol ta hopi orguyoso no solamente di su alumnonan, pero tambe di e docentenan. Lampe a menciona cu e ta mira con hopi hopi e docentenan ta traha y cuanto nan ta haci pa e alumnonan. E scol tin un cultura, cu ora ta den Examen periode, e docentenan ta bin riba diasabra pa duna extra les y e aña aki hasta riba diadomingo a bin duna extra les.
Parti di e exito, no ta solamente scol, alumno y e docentenan, pero tambe e mayornan cu tin un contacto estrecho cu nan. Hopi control, hopi comunicacion cu nan pa asina nan sa con nan yiu ta bayendo, unda nan tin cu mehora, na ki manera por sostene e muchanan. Tambe ta duna un gradicimento na Rotaract.
Pa e ultimo 3 añanan nan ta bin ta guia e muchanan, duna nan motivacion. Riba diasabra tambe nan sa bin y duna examen training. Nan ta duna tambe con pa deal cu examen stress, con pa prepara bo stof, con pa siña. Tur esaki hunto tin e porcentahe di 90%.
Pero nan no ta wordo prepara djis den 4de klas. For di momento cu nan cuminsa cu e scol, vooral den e prome 2 añanan, nan ta haya preparacion con pa nan ta un miho persona, miho disciplina. Ta traha hopi cu nan riba e aspecto social, riba e aspecto emocional. Ora cu nan yega den e di tres aña, nan ta bay riba un snuffelstage, cual ta yuda nan hopi, pa asina nan por mira di cerca kico en berdad un trabao ta encera cu ta den nan interes. Esaki ta yuda cu nan ta sea ripara cu esaki ta algo pe of ta bisa cu ta diferente.
Di parti di parlamentario Sue-Anne Ras, kende tabata ex docente di Filomena College, el a expresa cu despues di e di dos tanda e muchanan di Filomena College MAVO a logra saca 90%, cual ta un soño cu el a cuminsa cun’e 3 aña pasa, unda cu nan a cuminsa traha pa yega mas leu cu e muchanan y saca nan potencial p’adilanti. Tabata 3 aña cu el a bira coordinadora di klas 4, prome cu el a bandona veld. Ta papia di 90% y tur hende ta mira cu esaki ta mustra imposibel. Pero nan a logra, despues di 2 aña. Aña pasa a logra 86% e prome tanda, despues a bay pa 88%. E aña aki a logra 85% y despues a finalisa cu 90%.
E soño di 90% a keda persisti. E muchanan tin hopi potencial y por hopi. Mester kere den nan y yuda nan logra lo maximo. Pa logra esaki, a traha den un team. Tres aña pasa a structura e comunicacion entre mayor, scol y docentenan mes. A cuminsa tambe cu un programa hopi mas intensivo via Rotaract. Awe por mira su fruto. A bay traha hopi tambe den structura riba e fin di simannan. A habri scol den fin di siman pa e muchanan. Tabata traha schedule, docentenan tabata bin extra. Tabata guia y yuda e muchanan. Hopi biaha nan tin mester di trankilidad tambe, pero den un grupo ta studia miho.
Tips di mas importante ta pa build up e teamwork. E teamwork ta hopi importante. E no ta facil, segun Ras. E ta bin for di veld y e sa cu hopi biaha ta haya hopi contratiempo, ta haya hopi reto y bo kier logra hopi mas cu e muchanan. Pero si hunto cu un team, cera cabes y bo coy bo mayornan tambe, ta importante, inculca den e muchanan e importancia di nan estudio y kico esaki kiermen pa nan, e ta traha cu vision. Bo mester tin vision. Y e vision ey purba pa henter bo team ta carg’e. Si bo team ta carg’e y kere den dje, bo ta logr’e.
