Parlamento lo no apela caso contra Prensa

Na luna di Februari ultimo Presidente di Parlamento, mr. Ady Thijsen a dicidi cu e lo apela e sentencia di Corte den Prome Instancia cu nos colega Nelson Andrade a entama contra dje. E tempo ey el a cambia di abogado y a pone su confiansa den e bufete James Martin & Associates. E actual Presidente di Staten ta(bata) hasta traha eynan.

Pero siman pasa, un mayoria den e “Commissie Huishoudelijke Aangelegenheden” (CHA) di Parlamento a vota CONTRA e deseo di e Presidente y como tal e mester hala e apelacion aden.

Manera ta conoci, dia 1 di december 2017, a traha un raportahe sinta riba e stoel di Presidente di Parlamento, relaciona cu e discusion riba escudo di Aruba of e shoco den sala di reunion di Parlamento. E sala tabata bashi y no tabatin ningun reunion andando. A base di e raportahe, Thijsen a opta pa manda un carta pa Andrade y despues cu e ultimo aki a critica e carta den su noticiero na radio, a dicidi di mande un prohibicion pa drenta edificio di Parlamento. Hues mr. Sap a mira e asunto diferente y a duna Nelson Andrade rason pa busca su derecho y asina a elimina e decision di e Parlamentario. Es mas, Hues a bisa Ady Thijsen cu e NO tin ningun poder pa sanciona of duna castigo pa locual un hende haci of bisa pafor di sala di Parlamento. El a corde cu su “autoridad” ta cuminsa y caba den e edificio di Parlamento.

Obviamente e Parlamentario, cu de facto tambe ta abogado, no a keda contento ni cu e decision di e Magistrado y ni cu e forma con abogado mr. Nancy Gravenstijn a bringa su caso pe. Den Corte na dado momento e mes a tuma palabra te cu un rato Hues a corde cu ta den Parlamento e ta manda, pero cu den Corte ta Hues tin e poder maximo.

Awor el a acerca abogado mr. Gabri de Hoogd pa bringa e caso pe den apelacion. El a hasta hiba e abogado den e reunion di CHA pa purba convence e Parlamentarionan cu mester sigui cu e caso, pero asina mes no a logra.

No ta conoci si Parlamento den su mayoria a dicidi esaki basa riba e keho oficial cu nos a emiti na Sociedad Interamericana de Prensa (SIP) contra Parlamento y Gobierno di Aruba, of si ta pa motibo cu nan tambe ta considera esaki un conflicto di interes cu Thijsen ta uza su mesun bufete pa bringa caso pe, of si ta pasobra di berdad e Parlamentarionan mes ta ripara cu un guera cu media no ta gana nunca!

E miembronan di e “Commissie Huishoudelijke Aangelegenheden” (CHA) di Parlamento di Aruba ta Rocco Tjon (MEP), Marlon Sneek (AVP), Ricardo Croes (RED) y Marisol Lopez (POR). Parce cu e representante di RED, cu publicamente no ta simpatisa cu e media ni nos redactor, a vota na fabor di e apelacion pero mayoria di e otronan, incluyendo MEP, a vota contra pa sigui cu e caso di apelacion, lagando Ady Thijsen cay den e discusion innecesario aki.

Sinembargo, abogado mr. David Kock, cu ta representa nos media, Headlines Group y Nelson “Speed” Andrade te awe no a haya notificacion cu a hala e caso aden, aunke cu for di Parlamento nan a confirma na nos caba cu “Boso no worry, Ady no tin sosten aki den!”

Comments

comments