Shete tips pa negoshinan chikito y mediano pa e tempo aki

Monarch CPA LLC ta reconoce cu como comunidad nos ta den un temporada unico aki na Aruba pa un circunstancia cu no a afecta Aruba solamente, pero henter mundo. Pa e motibo aki, Monarch CPA LLC ta kere cu ta importante pa comparti informacion cu ta relevante pa comerciantenan y entrepreneurs, specialmente esunnan chikito y mediano. Na final di dia, ta nan ta esunnan cu ta forma un gran parti di nos economia local, e asina yama ‘wes’i lomba’.

Por medio di e articulo aki, Monarch CPA LLC ta comparti 7 tips pa considera durante e periodo aki cu a wordo afecta dor di COVID-19.

1.Impuesto
Departamente di Impuesto y varios otro instancia a manda comunicadonan di Plan di Alivio Fiscal 2020 (https://www.impuesto.aw/plan-di-alivio-fiscal-2020/). Sigur como un negoshi bo lo mester consulta e 14 puntonan menciona den e plan di alivio fiscal aki. Si en caso cu bo ta realisa actividadnan relata na turismo, nos ta recomenda bo enberdad pa probecha di e oportunidad pa haya mas tempo pa paga. Si en caso cu bo no ta ta realisa actividadnan relata na turismo y toch bo ta wordo afecta, Departamento di Impuesto no lo cobra boet pa pagonan atrasa. Nos ta recomenda pa paga e impuestonan den e periodo custuma door cu porta entradanan no ta drentando of ta drenta mas laat cu normal, purba di por lo menos paga parcialmente y paga e resto di suma ora entradanan cuminsa drenta bek. E ultimo recomendacion ta loke sigur e negoshi kier haci, esta entrega e aangiftenan na tempo. Esey no ta costa nada y specialmente cu e servicio digital di Impuesto e por wordo haci sea na oficina of na cas.

  1. Empleado y beneficionan
    Varios instancianan y profesionalnan a comunica tocante e topico aki y nos ta apoya e opcionan laboral manera ‘tuma dianan di vakantie’, ‘dianan na cas cu pago’, of ‘dianan na cas sin pago’. Mas cu claro e ultimo opcion ta bin tambe cu opcion di haya asistencia for di Gobierno di Aruba pa medio di e Fase Helpdesk (https://www.fasehelpdesk.com/forms/). Alabes, semper posibel pero un opcion tambe ta pa e director di e negoshi sea core full su salario, pero no page (lo paga esaki ora tin entrada atrobe), e baha su salario di luna, of no core salario pa luna pa asina por yuda baha e gastonan di e negoshi y retene esaki pa futuro. Esaki ta yuda paga gastonan di utilidad of empleadonan riba payroll ainda y alabes spaar pa futuro.
  1. Acomodacion
    Riba e topico aki tambe tin varios comunicacion den ultimo dianan tocante di huur. Nos ta recomenda e negoshinan pa lesa e articulonan cu ta wordo detaya den bon liña y cu lo por asisti bo negoshi den e temponan aki. Nos ta recomenda e negoshinan tambe pa combersa cu e doño di e espacionan comercial pa wak na cua areglo por yega, sea pa terminonan di pago of porta pa un reduccion di huur pa un temporada. Alabes si bo negoshi ta cera of tin oranan reduci, bo lo bay spaar riba coriente y awa. Tuma e spaarmento aki di utilidadnan pa otro gastonan di coriente cu bo lo bay tin of spaar esaki pa futuro.
  2. Consulta cu bo accountant
    Bo negoshi no tin solamente un persona cu ta haci bo administracion, cera bo aña financiero, y yena bo aangiftenan, pero bo accountant tambe ta un persona cu lo por yuda bo compronde e cifranan financiero miho y consecuentemente recomenda bo unda lo bo por reduci gasto. Sea nan ta gastonan administrativo, di mercadeo, accomodacion, of cualkier otro gasto. Un accountant por yuda Bo determina ki pasonan pa tuma pa asina bo por haci miho uzo di bo entradanan of yudabo spaar. Bo accountant alabes tambe por ta un ‘liaison’ pa bo y bo instituto financiero pa asina por jega na areglonan di pago sea otorga door di e institutonan previamente of door di yega na un otro areglo. Combersa cu bo accountant pa brainstorm poco riba bo negoshi pa wak kiko por y kico no por. Probecha alabes pa pasa dor di cifrasnan pa hasi un checkeo financiero di e cifranan di bo negoshi, en caso e no ta wordo haci regularmente.
  3. Mision, vision y strategia
    Hopi biaha doñonan di negoshi y entrepreneurs ta asina ocupa cu nan operacion diario cu e tempo no ta jega pa evalua e negoshi sea pa e estado di coriente of pa planesnan pa futuro. Tuma e momento aki pa pensa riba e mission, vision y strategia di bo compania. Porta e lo keda mescos cu ora ba cuminsa pero alabes porta bo kier bay den un otro direccion, sea dor di introduci conceptonan nobo, hasi procesonan mas efficiente of cuminsa un aventura den otro mercado of industria. E punto aki ta tuma tempo aworaki pa pensa riba dje y mas importante scirbie riba papel como un documento formal y usa e documento aki pa sigui guiabo den futuro.
  1. Connecta cu bo clientenan
    Maske cu nos ta ta den e proceso di shelter in place y toque de queda y porta bo negoshi mester ta cera, a adapta horario, of adapta tipo di servicio, esey no kiermeen cu bo no mester keda in touch bo clientenan. Un di ventahanan cu nos tin ta cu nos ta den e era digital y era di social media. Nos ta recomenda pa bo keda in touch cu bo clientenan por medio di social media y expone bo producto of servicio pa asina bo por crea y mantene bo ‘brand awareness’. Esaki no lo resulta den entrada immediato pero creando e coneccion y e ‘brand awareness’, asina cu nos surpasa e retonan, bo lo kier ta sigur cu bo clientenan ta bin bek serca bo of bo lo atrae clientenan nobo.
  2. Consulta cu bo suppliers
    Por ultimo, manera nos a menciona previamente, entradanan por ta menos y gastonan igual of mas, y como consecuencia e flujo di efectivo por wordo afecta. Door cu nos no sa ainda con hopi e temporada aki lo bay dura, bo lo kier tene bo efectivo y balans riba e cuentanan bancario lo mas largo posibel. Como resultado, nos ta recommenda pa bo consulta cu bo suppliers mas grandi ki posibilidad tin pa extende termino di pago. Nos no ta recomenda pa no paga, pero pa utiliza terminan di pago of wak si por jega na un otro arreglo. Esaki ta algun tips cu nos kier a duna e negoshinan chikito y mediano teniendo na cuenta e situacion precario cu nos ta aden y spera cu e lo por yuda di un of otro forma. Pa mas informacion di Monarch CPA LLC por bishita nos webpage na https://www.monarchcpallc.com of nos Facebook page https://www.facebook.com/monarchcpa

Noticia relacionaMas for di e autor