297sports hunto cu Tele Aruba lo lansa un programa deportivo nobo titula “Na Mesa cu Andrew y Seever”

Despues di varios luna di planificacion 297sports conhuntamente cu Tele Aruba ta cla pa lansa nan programa Deportivo nobo Na Mesa cu Andrew y Seever.

Den e programa Na Mesa nos lo combersa cu nos atletanan local como tambe invitadonan special. “Na Mesa” un programa deportivo cu lo trata diferente topico cu sugerencianan valioso na e progreso di nos atleta, dirigente y organisacionnan di deporte. Na banda di esey nos lo tin storianan impactante como tambe concientisa nos comunidad pa biba un bida saludabel.

E idea a nace despues di e cobertura maratonico cu Tele Aruba hunto cu colaboracion di 297sports a haci den Crossing For Hope unda a dicidi pa sigui traha hunto y bini cu un otro concepto di deporte na television cu nos ta custuma cune.

Prome invitado Sra. Sandra Brown

E prome filmacion a wordo realisa den museo Nicolaas Store na San Nicolas. Como prome invitado “Na Mesa cu Andrew y Seever” nos tin nada menos cu Sra. Sandra Brown, mama di nos astro pelotero di Boston Red Sox, Xander Bogaerts. A elabora cu Sra. Brown e bida di un mama soltero cu a traha y lucha duro pa e exito di su yiunan.

Den nomber di 297sports y Tele Aruba nos kier a gradici Sra. Sandra Brown pa acepta nos invitacion y comparti cu nos e bunita storia di famia Brown/Bogaerts.

E lauching oficial di e programa “Na Mesa cu Andrew y Seever” lo ta Diasabra 16 di maart pa 1or di merdia na Tele Aruba canal 13.