Un total di 258 studiante a gradua na Colegio Arubano

Diaranson merdia, 12 di juni, 89 alumno di VWO y 169 alumno di HAVO a ricibi e grato noticia, cu nan a gradua pa nan examen final.

E alumnonan cu a obtene e diploma tan anhela, ta respectivamente; 72% di e candidatonan di examen di VWO y 57% di e candidatonan di examen di HAVO. E aña aki, en total, 421 alumno a haci examen: 123 pa examen di VWO y 298 pa examen di HAVO.

E porcentahe di graduado pa VWO ya caba a surpasa esun di aña pasa. E total di candidato cu a gradua e aña anterior, finalmente tabata 68% di e examinadonan di VWO. E expectativa e aña aki tambe ta, cu despues di herexamen e porcentahe di graduado ta pasa 72%. E herexamennan lo tuma luga dia 17 te cu 20 di juni.

Aña pasa 70% di e total di examinado di HAVO a gradua. Pa alcansa e mesun porcentahe e aña aki, e candidatonan di herexamen di HAVO mester tin hopi bon resultado. E docentenan di Colegio Arubano ta brinda extra guia na e alumnonan, pa asina nan tambe logra haya nan diploma. Den examen di VWO, Colegio Arubano a logra resultadonan excelente. Riba e lista di cifra di un alumno ta luci dos dies; pa Wiskunde-B y -D. Un otro alumno tambe tin un dies riba su lista di cifra pa Wiskunde-B. Colegio Arubano ta sumamente orguyoso di e genionan aki, cu nan cifra maximo. Mihor graduado pa VWO ta Rebecca Croes y pa HAVO ta Andrea Wouters.