24ora.com na Rocco Tjon: Nos tin algun pregunta pa Bo haci Husticia di Aruba

446

Nos a tuma e ponencia haci awe mainta pa lider di Fraccion di MEP, Rocco Tjon, den forma masha positivo. Beter laat dan nooit! A laga casi dos aña pasa, cu mannan crusa, mientras Prensa tabata victima di persecucion politico y awor cu a opta pa keha internacionalmente, diripiente ta haci pregunta.

Tjon, un ex Inspector di Polis, ex Director di KIA, ta supose di conoce nos sistema hudicial hopi bon y mester por sa cu locual a sosode ta crusa tur limite di normalidad y custumber! Rocco Tjon no solamente a studia na Hulanda, sino tambe a sigui cursonan importante na FBI na Merca y como tal den nos wowonan ta consider’e un Polis elite, bon prepara y cu bon conocemento di locual ta sosode riba “werkvloer”.

Awor cu kier haci pregunta na Minister Andin Bikker relaciona cu persecucion politico riba miembronan di prensa na Aruba, nos ta elogia y encurasha. Laga nos yud’e cu poco pregunta, cu nos ta sinti ta valido y cu kisas, e lo durf di haci Minister Andin Bikker di Husticia. Nos ta bisa “durf” pasobra tur hende sa cu e cartera ey lo mester a bay pa Tjon mes, cu na number 8 riba lista di MEP a logra haya 1213 voto riba su nomber den su prome salida, mientras cu Andin Bikker siendo number 2 riba lista di POR a haya no mas di 1086 voto riba su nomber, cayendo for di 3047 voto. Bikker a resulta un di e candidatonan cu a “cay” mas den voto e ultimo eleccion, pero pa por tin Gobierno, MEP a haya nan mes forsa pa “sacrifica” Tjon pa toch forma Gobierno cu POR y asina duna nan e cartera di husticia, esun mas critica den comunidad e ultimo temponan.

Preguntanan cu nos lo kier haci pa Rocco Tjon considera na haci na su lider y na su partner den coalicion ta:

• Chauffeur di Minister Otmar Oduber, porcierto un Polis, a busca un Venezolano ilegal na Aruba, den auto di Minister y hib’e Bestuurskantoor den ora di anochi y bis’e cu si e declara contra Marko Espinoza, cu Minister Oduber lo percura pa e haya permiso di estadia y trabou na Aruba. Esaki e mesun “testigo” a declara y ta skirbi den su declaracion oficial na Recherche. A pidi Landsrecherche investiga e Polis aki pa “omkoperij”? Tjon, como ex Hefe di Recherche, ta haya e forma aki normal pa busca un testigo y despues lag’e bandona Aruba tambe, pues no t’ey mas pa responde pa su declaracion?

• Oficina di Minister a yama Comisario Trudy Hassell anochi, cu a manda yama “Piket Recherche” pa bay tuma declaracion di e Venezolano ilegal na Bestuurskantoor mes. Como ex recherche, Bo mes no ta sinti cu esaki ta crea un sentido di conflicto di interes?

• A bay cu un cantidad di computer y material personal cu a haya na cas di Espinoza. A cer’e, a investiga y despues a entreg’e TUR COS bek! Nada a keda den beslag pasobra nada ta horta! Y awo, casi dos aña despues ainda e caso no tin fin di yega Corte pa sa si Husticia (bou wowonan di Minister Andin Bikker) a abusa di nan poder y a bay “ciego” tras di simpatisantenan politico cu a entrega un keho falso cu un tinte politico, pa laga partido AVP mustra malo pero cerando hende inocente.

• Na di dos ocasion, a bolbe bay cas di Espinoza, bou pretexto cu e tin un radio di Polis scondi na su cas. A busca y no a haya nada. A cer’e un siman largo y Landsrecherche tur dia a menas’e di lo detene su tata (Hulandes) pa interogacion  y di lo laga saca su mama (cu firma liber) for di Aruba y di detene su ruman muhe (cu paspoort Hulandes) studiando na Hulanda. Tur pa e  divulga ken ta fuente di 24ora.com. Cua Polis ta duna nos “tip” of si ta paga Polis pa fia radio of haya tip. Tjon, Bo mes como Polis y Parlamentario awo, Bo sa cu Prensa ta goza di inmunidad pa defende su fuente te final? Con un Polis por uza e trayecto penal pa oprimi un miembro di prensa? Corda bon: NO a haya radio di Polis na cas di Espinoza ni na ningun colega di 24ora.com!

• A cera nos colega Nelson Andrade, sin ningun keho contra dje haci. Ora a cer’e a purba interoga otronan pa mira si por haya motibo pa want’e cera. Landsrecherche no a haya ningun radio na su cas! A purba cune tambe, pa e divulga su fuentenan den Polis. Algo cu el a bisa di hamas e lo haci. A lag’e bay.

• Con por ta posibel cu, siendo tur Polis na Landsrecherche ta Hulpofficier van Justitie, dicon a bay te na Warda di Polis di Oranjestad pa busca un otro HOvJ pa cera Nelson Andrade? Esaki ta normal? Bo mes no ta haya cu ora tin tanto “bulamento di pipa” di Landsrechercheurnan cu no ta laga Bo pensa cu ta “ordo” nan a haya di ariba, siendo nan tur sa cu nan ta simplemente cumpliendo cu un sed di vengansa politico disfrasa cu un supuesto acusacion cu a sali di e mesun Ministerio di Husticia?

Nos di Headlines Group, cas editorial di e medio di comunicacion mas grandi di Aruba, ta habri pa ki dia cu ta cu e Parlamentario “por”, pa topa cu nos pa mustr’e mas prueba y suministra mas informacion con e “tremendo aparato hudicial” ta trahando na Aruba. Nos lo sigui warda, pasobra nos ta kere den e bon intencionnan di e hoben politico aki. Un dia e lo habri su wowo y realisa cu como un homber di husticia, el a hinca su mes den un industria caminda no loke ta “bon” ta sosode, sino loke tin “draagvlak politico”!