2018 tabata un aña cu basta tension y reto pa SEPPA

SEPPA ta representa e empleadonan publico. Magali Brito, secretaria general di e sindicato, a splica cu den 2018 ta bon conoci cu nan a habri aña cu e prome situacion basta tenso cu a cuminsa bao di e maestronan, cu ta cay bao di e departamento di DPS.

Ora cu for di e momento cu e minister a anuncia su intensionnan pa un biaha mas independisa e departamento aki, papiando aki di un grupo grandi di trahado, cu rapidamente a bin basta reaccion.

Por corda diferente encuentro cu hasta e grupo di e propio maestronan tabata organisa, pa tene nan mes y demas coleganan na altura di henter e desaroyo.

Tabata tin basta tension, segun Brito. Esaki tabata un mensahe pa gobernantenan, incluyendo e parlamentarionan cu ta sali for di mundo di enseñansa, a haci nan expresionnan y a mustra den parlamento un sosten na e pensamento di e maestronan, cu no tabata tin ningun necesidad pa independisa.

Al contrario. A insisti riba e mesun posicion cu SEPPA a hiba p’adilanti, esta fortifica e departamento aki cu mas personal y yud’e pa e por carga henter e grupo grandi di trahado aki.

Esey tabata e experiencia hopi fastioso pa e maestronan.

Igualmente tin e grupo di Trai’ Merdia. Tambe ta cay bao di DPS. E grupo aki a wordo nombra como ambtenaar y den e sentido cu awor aki cu a acerca e trahadonan cu intencion di cambio, tambe a haya resistencia di parti di grupo di trahado aki.

Aunke cu prome cu fin di aña, ainda na Trai’ Merdia, bo por mira cu minister a bin cu cierto intencionnan, na cual, segun SEPPA asina e ta hiba e centro mas dilanti. E trahadonan lo conoce un miho carera, cual como sindicato, tambe por sostene den e pensamento pa un miho carera pa e trahadonan di Trai’ Merdia.

Solamente ta kere cu mester ta cauteloso y tuma tempo pa analisa esakinan y haci’e den e miho manera, pa evita manera nan ta bisa cu e trahadonan por carga e consecuencianan.

Di un otro banda, pa e aparato publico, despues di e ultimo eleccion a laga diferente reorganisacion cu tabata tumando luga den e diferente departamentonan. Berdad tin un gobierno nobo, ministernan nobo.

A tuma un rato ainda pa wak kico lo ta nan intencionnan. Si ta intencion a sigui cu e distucionnan aki, na un manera cu e gobierno anterior a laga riba mesa, si of no, pa por mira e discusionnan cu a yega na dje, te con leu nan ta.

Y cua di nan lo haya prioridad di e gobierno aki, pa sigui traha cun’e, den 2019. Un di nan, e ultimo lunanan, tin trahadonan basta preocupa na e grupo di trahadonan cu ta cay bao di Guarda nos Costa. Eynan tambe tin full un pensamento pa bin cu un departamento nobo. Esaki no tin mucho claridad ainda.

SEPPA a busca informacion entre otro na Departamento di Recurso Humano, cerca e minister tambe, te con leu nan ta. Pa motibo cu e minister actual lo tin un idea, un formatieboek. Pero di otro banda, tin esun prome caba cu ya caba tabata bezig cun’e, pa imigracion completo. Ya cu Guarda nos Costa, e trahadonan un cierto momento pa opta tambe pa e opcion pa mas bien cay bao di imigracion y no bay cay bao di KPA.

A habri 2019 cu esey ta caba riba agenda. Ta kere cu den e siman aki ainda, lo tin e reunion cu e minister, cu esnan encarga cu e management team na imigracion, sindicatonan y tambe DRH, pa wak kico ta e formatieboek, cu lo bay discuti riba dje.

Obviamente no por tin dos pa tres porposicion riba mesa. Gobierno mester bin cu un solo proposicion. E proposicion cu e tin cu pone fondonan disponibel. Pa facil pone cosnan bunita riba mesa, si na final pais Aruba no por bay carg’e. Ta un claridad cu tin cu haya tambe.

Apart di esey, cu ta e reorganisacionnan, tin diferente departamento tambe den gobierno cu tin asuntonan cu mester wordo atendi. Un tema hopi importante cu tin cu wordo atendi den 2019, ta loke ta mas preparacion pa por sigui funciona y duna e miho servicio na nos comunidad.

Pa esaki no solamente e mester ta preparacion, formacion of opleidingnan pa e departamentonan di cual, den nan carera of den nan rangenstelsel ta stipula caba e necesidad pa esaki, pa nan por bay dilanti.

Tambe den e departamentonan unda cu no tin ni esakinan, pero ta na su luga pa nan por haya e tiponan di refreshment, pa laga bay un poco mas cu e desaroyo y e tecnologia. Por ta pa ta un poco mas eficiente den e servicio cu ta wordo bisa.

Tambe SEPPA tin un preocupacion pa loke ta trata e fundacionnan cu ta duna un servicio na comunidad. E fundacionnan cu ta duna servicio na por ehempel na esnan cu ta manera Casa Cuna. Ta haya tambe manera un Ambiente Feliz, Imeldahof. Ta haya diferente fundacion cu ta duna servicio special pa esnan vulnerabel den nos comunidad.

Un servicio en principio cu pa historia ta di un pais Aruba, pero cu a wordo duna na fundacionnan pa por haci esaki. Pero cu awor aki, despues di algun aña caba tin intencionnan pa duna un subsidio a base di output service, cu tur e consecuencianan cu esaki.

Di un otro banda tin loke a wordo negosha hopi aña atras pa lidernan, kisas hopi prome cu esunnan actual di SEPPA tambe, bin cu un areglo di subsidio, unda cu ta garantisa condicionnan laboral pa e trahadonan cu ta traha den servicio di e fundacionnan. Condicionnan financiero cu en todo caso ta mescos cu cualkier empleado publico y cu awor aki cu e sistema di output service cu nan kier duna subsidio un suma di placa y bay traha cun’e y wak con bo ta saca bo som. Esey por tin su consecuencia pa e trahadonan.

Ta situacionnan cu ainda por a haya ta bolbe keda papia cu e directiva di e fundacionnan, pa motibo cu ainda no tin claridad.

Muy apesar cu e gobierno actual tanto na December 2017, como na e prome lunanan di aña 2018, a haci expresion por medio di minister di asuntonan social, Glembert Croes, cu no ta ningun momento e intencion pa kibra of kita ningun derecho adkiri di e trahado di e fundacionnan.

Mirando cu e situacion ta persisti, lo bolbe plantea e asunto aki cerca e minister pa e lanta e comision ey cu el a bisa cu e lo bay haci, pa trece un claridad y e ora eynan pa definitivamente stop cu e wega di trata di kita derecho for di trahado di fundacionnan.

Den otro liñanan general, tin diferente otro asuntonan, cu igual mester a atende pa empleadonan publico, cu tambe tin nan consecuencia pa e fundacionnan.

Segun Brito, cu esaki, den e prome luna caba di 2019 lo keda plantea na e minister pa wak si nan lo haya atencion tambe for di e ministernan concerni.

Comments

comments