11% clientenan no a paga nada di belasting di auto

E di tres termino di pago di belasting di auto ta vence proximamente. Y ainda tin 11% di e clientenan cu no a haci ni e prome pago ainda. Esaki a wordo bisa door di Luenne Gomez Pieters, director di Departamento di Impuesto (DIMP).

E aña’ki a permiti e ciudadano haci pago den 4 cuota y a constata cu un grupo chikito a paga full aña, mientras cu un otro porcentahe toch basta bon tin mita aña paga. Sinembargo tin e problema cu ta presenta tur aña y esey ta cu 11% di e clientenan registra na DIMP no a cumpli cu ni un pago ainda di 2019. Den cifra esaki ta representa 9505 cliente cu no a cumpli. Esaki ta un tiki menos cu e cantidad di personanan cu no a paga ora cu e prome kwartaal a vence na maart.

E tempo ey tabatin 11.993 persona cu no a paga y aunke el a baha, no por keda sin menciona cu e cifra di no pagadonan ainda a keda hopi halto.
DIMP ta encurasha e clientenan pa pasa mas lihe posibel y no warda te na ultimo ora pasobra e filanan ta bira largo, cu e consecuencia cu e clientenan lo mester para of sinta oranan largo warda su turno. E siguiente fecha di vencimento di pago ta prome di juli, 2019.
No lubida cu esnan no paga na tempo por haya un boet. P’esey ta miho paga na tempo.