Den luna di desèmber 2018 CHATA a registrá un okupashon di hotèl di 74.3%. Esaki ta un kresementu positivo di 2.4% kompará ku na aña 2017.
Ámbos e tarifa promedio diario (ADR) i e entrada pa kamber disponibel (RevPar) a subi den luna di desèmber, segun sifranan di CHATA. E tarifa promedio diario tabata $195.18, kual ta $19.53 mas ku na 2017. I e entrada pa kamber disponibel tabata $145.11, kual ta $19.09 mas ku e aña promé. Luna di desèmber ta señalá inisio di temporada altu den industria di Turismo. Tin un demanda altu pa nos destinashon, spesialmente serka paisnan ku wer friu manera Hulanda. Sifranan di okupashon di hotèl ta kolektá pa STR tur luna i ta basá riba 11-14 propiedat ku ta representá un total di 2500 kamber riba nos isla.
Den e próksimo simannan, CHATA lo emití tambe un análisis di aña reflehando riba e okupashon di hotèl den 2018. Sifranan ta indikatorio ku 2018 a surpasá 2017. Pa mas informashon tokante okupashon di hotèl por bishitá www.chata.org.
