Awe dialuna pa 4:00pm ta tuma luga un reunion urgente na oficina di sindicato SIMAR na Sabana Blanco. Un ke otro tin di haber cu un inkietud grandi bou di docentenan, relaciona cu posibel continuacion di e maneho di Minister dr. Rudy Lampe pa uni Scol Practico di Ofishi (SPO) Brazil y esun di Santa Cruz. El a bisa di lo no a sigui cu e idea, pero e docentenan ta notando movecionnan contrario. Sindicatonan SIMAR y SEPPA lo topa nan miembronan disgusta awetardi.
A invita e mandatario pa e tambe ta presente awe den e reunion na SIMAR. Ey e docentenan ta spera di haya contestanan satisfactorio, pa evita ideanan resonando den gangnan di scol, pa pone trabou abou. Mayoria ta sinti cu e maneho den enseñansa a bay tras e ultimo aña aki, cu varios decision “ad hoc” y sin consulta esunnan trahando den e ramo of cu por splica miho di kico ta “come y bebe” den e materia. Ta sinti cu Minister Rudy Lampe ta sigui consehonan robes, cu consecuencia cu por daña tur locual a construi hunto e ultimo añanan den enseñansa.
Paso pa Futuro
No ta conoci si docentenan di Scol Paso pa Futuro, situa unda antes tabata Huishoudschool banda di Postkantoor na Oranjestad. Ey tambe ta scuchando rumornan persistente di lo kier muda e scol pa un otro localidad, pa por acomoda Beatrixschool eynan. E docentenan ta considera cu ta tumando decisionnan sin debido consulta of dialogo cu partidonan envolvi. Ta via via ta scucha di e ideana nobo aki, cu tin consecuencia directo pa nan operacion.
Eynan tambe ta reinando un inkietud grandi bou di e trahadonan, debi cu algun tempo atras a laga sa di lo kier a uni e scol cu Emmaschool. Despues cu docentenan na ambos scol a protesta, e mandatario a dicidi pa hala atas y distancia di su idea. Awor ta scuchando cu kier “swap” Beatrixschool y Scol Paso pa Futuro. Kier saca e scol situa banda di Postkantor y hink’e den unda Beatrixschool ta awo na Sero Blanco. Y manda Beatrixschool eynan. E motibo pa e intercambio aki no ta bon conoci, sigur on cerca e docentenan di ambos scol, cu ta buscando claridad awor cerca e mandatario.
Nada riba papel
E dos sindicatonan SIMAr y SEPPA ta defende interes di docentenan riba nos isla. Nan ta lamenta e incertidumbre aki pero e tin di haber cu e forma menos profesional di maneha di e mandatario. “E no ta pone nada riba papel, tur cos ta bay verbalmente”, asina por lo menos un dirigente di un di e sindicatonan a confirma na nos redaccion.
E mandatario ta papia un cos cu un grupo pero ta papia otro cos cu un otro grupo. Den ambos caso e no ta confirma e acuerdo riba papel cu despues por compara. E ta haci tur cos verbalmente, lagando espacio habri pa mal interpretacion of pa causa iritacion innecesario.
