𝐄𝐥𝐬𝐚 𝐑𝐨𝐳𝐞𝐧𝐝𝐚𝐥 𝐝𝐢 𝐌𝐀𝐍: 𝐀𝐰𝐨𝐫 𝐦𝐚𝐬 𝐤𝐮 𝐧𝐮𝐧𝐤𝐚 ‘𝐒𝐭𝐞𝐮𝐧𝐩𝐮𝐧𝐭 𝐰𝐞𝐫𝐤𝐳𝐨𝐞𝐤𝐞𝐧𝐝𝐞𝐧’ 𝐦𝐞𝐬𝐭𝐞𝐫 𝐭𝐚 𝐟𝐮𝐧𝐬𝐡𝐨𝐧𝐚𝐥

215

Manera nos tur sa e krisis di Corona a kousa ku un grupo grandi di hende a pèrdè trabou òf ku ainda ta den insertidumbre kiko ta bai pasa ku nan trabou i nan entrada di tur luna. Desaroyonan di e último 2 lunanan a mustra tambe ku e kantidat di vakaturanan a baha. Esaki tabata bisto riba e página di Facebook Kòrsou TIN Trabou di parlamentario Rozendal durante e ‘lockdown’.

Esaki ta pone ku no ta fásil òf mesora e hendenan ku ta buska trabou por yega na otro trabou. Rozendal ta kontentu si pa mira ku awor poko poko e vakaturanan a kuminsá “pick up” atrobe i ta indiká ku ta p’esei awor mas ku nunka ‘Steunpunt werkzoekenden’ mester ta funshonal. 

Rozendal ta indiká ku tin análisis hasí dor di e tim di Fondo di Sosten ku a mustra ku dor di e krisis di Corona e desempleo na Kòrsou por krese yega entre un 40 pa 60 porshento. Awor aki e ta na 40 porshento. Esaki ta hopi alarmante. P’esei awor aki mas ku nunka mester atendé nos hendenan ku a pèrdè trabou dor di duna nan un sosten (emoshonal) i guianan pa eventualmente subi bèk riba merkado laboral. Awor ta e momento pa saka un man pa nan por lanta bèk segun Rozendal. 

Rozendal ta bisa ku ta bin aserka ku e krisis di Covid-19 a i ta bai pone ku trabounan tradishonal ta bai kambia. Esaki ta e fenómeno konosí komo “Future of Work”.  Mester tene na kuenta ku mester kuminsá prepará nos hendenan ku a pèrdè trabou òf ku ta buskando trabou pa e tipo di trabounan di futuro aki.  Den e kuadro aki e Parlamentario a manda un karta pa Minister Koeiman di e ministerio di Desaroyo Sosial, Labor i Bienestar.