Den cuadro di nan programa educativo y progresivo, YMCA Aruba ta ofrece diferente curso di cushinamento pa adulto desde e siman di 2 di October 2017.
YMCA hunto cu instructor Glenn Ridderstap ta ofrece un curso ‘Specialidades di Pasco’ y un curso ‘cuminda crioyo y snacks’. E cursonan aki ta pa un duracion di 5 siman y e lesnan lo tuma luga un biaha pa siman di 6:30pm pa 9:00pm na YMCA Dakota. Lo ofrece e curso di Specialidades di Pasco riba tur dialuna, mientras lo ofrece curso pa cushina cuminda crioyo y snacks tur diaranson.
Inscripcion ta costa solamente Afl. 150,=. For di experiencia por bisa cu e cuponan ta yena lihe y pa e motibo aki YMCA Aruba ta haci un apelacion na cada cursista pa inscribi mas pronto posibel. Na final tur cursista lo ricibi un certificado.
YMCA Aruba ta invita e pueblo di Aruba pa pasa inscribi na YMCA Dakota, situa na Calabasstraat 1, of pa yama libremente na 5823072 pa mas informacion.
Young Men’s Christian Association (YMCA) ta funda dia 6 di Juni 1844 door di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben.
Bob Steele a funda YMCA Aruba 61 aña pasa door di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.
YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 27 aña pasa cu un programa di asistencia cu huiswerk y recreo.
