E studiante Arubano Xavier Geerman a gana e premio di Stichting Ateliers Tilburg. Esaki a tuma lugar durante di e entrega di e Jacques de Leeuw Prijs 2018 na Tilburg.
Xavier cu ta studiando na Fontys Hogeschool voor de Kunsten tabata un di e seis studiantenan cu tabata nomina pa e Jacques de Leeuw Prijs 2018.
Xavier a ricibi su premio for di man di Wilbert van Herwijnen, presidente di Stichting Ateliers Tilburg. Cu e premiacion e fundacion ta pone un aña un atelier disponibel na Xavier Geerman pasobra e fundacion ta mira den Xavier un componista prometedor, cu por desaroya su mes aun mas pa medio di e espacio cu e atelier ta brinde.
Minister Plenipotenciario Guillfred Besaril cu a presencia e anochi a felicita Xavier cu su premio y a bisa di ta contento pa mira cu nos hobennan cu talento ta sobresali na Hulanda. Alabes e mandatario a topa y papia cu Karen Neervoort, directora di Fonty’s Hogeschool voor de Kunsten.
E Jacques de Leeuw Prijs 2018 mes a wordo gana pa Peter van der Heijden den e categoria docente y Piet van Dycke den e categoria di artista.
