Cu enfoke riba modernisacion, cambio di maneho, promove eficiencia y ofrece mas y miho servicio, WEMA Aruba a drenta un etapa di cambionan strategico den nan forma di haci negoshi. Cu esaki, clientenan lo nota algun adaptacion, cu sin duda lo traduci den miho servicio. E cambionan lo encera renobacion di e tiendanan y lo cera e sucursal riba Boulevard, pero lo sigui ofrece tur e productonan den WEMA Ponton, Santa Cruz y San Nicolas.
Ta importante pa menciona cu e cambio di strategia lo no inclui reduccion den empleadonan, pero si den concentracion di e servicionan y benta di productonan den e tres tiendanan existente. E tiendanan lo pasa den un renobacion grandi, tanto pafo como paden di e edificionan. Lo nota e cambionan desde e aña aki pero sigur den aña 2018 ainda, ora cu finalisa e fase aki, cu lo encera tambe ampliacion di nan liñanan di producto.
Sin kier bay mucho den detaye, WEMA por anuncia cu un di e cambionan cu lo drenta na vigor pronto ta nan orario, ora cu nan lo cuminsa traha 12 ora pa dia, desde 7:00am te cu 7:00pm, pa por duna clientenan mas oportunidad pa haci compras.
Un di e productonan mas popular na WEMA ta verf. Desde aña 2010 WEMA ta representa e marca Valspar, cu a bira masha popular, tanto den uzo comercial como na cas. Asina bon cu e compania internacional a opta pa introduci 13 color premixed di Valspar special pa WEMA so. Esaki nan a haya e nomber di “WEMA Colors…The Colors of the Caribbean” den verf di awa y verf di azeta.
Pa por canalisa e cambionan den e compania y pa por tin famia Wever den e tiendanan mes, pa atende directamente cu clientenan, a opta pa atrae un talento nobo como Gerente General di e compania, den persona di Jokoeza Hooplot, kende ta trece cune amplio experencia for di Hulanda. Den su man lo keda e tarea pa por hiba WEMA na e siguiente nivel di crecemento.
WEMA Aruba ta probecha pa anuncia na mes momento cu ta nan intencion pa pronto introduci un carchi di miembro nobo, pa tur nan clientenan fiel, sea ta clientenan comercial of domestico. Pa tur lo tin descuentonan special y cu oportunidad pa gana premio. Keda pendiente!
A funda WEMA na Mei 1982. E prome tienda a habri na San Nicolaas y durante e añanan cu a transcuri a crece cu 3 tienda mas. Awendia WEMA ta situa na San Nicolaas, na Ponton, riba Boulevard y na Santa Cruz. Hunto nan ta 92 empleado cu diariamente ta ofrece e miho servicio, bendiendo productonan di calidad superior pa bo cas, pa construccion of pa embeyece bo hogar. Pa mas informacion bishita e website (www.wemaaruba.com) of riba Facebook facebook.com/wemaaruba.
